Túrkistan oblysy ákiminiń orynbasarlary shalǵaı aýyldarda turǵyndarmen kezdesýde
TÚRKІSTAN. QazAqparat - Túrkistan oblysy ákiminiń orynbasary Meıirjan Myrzalıev Jetisaı aýdany Yntymaq aýyldyq okrýgine qarasty Aqnıet aýylynda turatyn kómekke muqtaj otbasylarmen kezdesti, dep habarlaıdy QazAqparat óńir basshysynyń baspasóz qyzmetine silteme jasap.
Júk tasýshy bolyp nápaqy tabatyn otaǵasy oblys ákiminiń orynbasaryna kásipkerlik negizderinen bilim alyp, memlekettik grant kómegimen óz kásibin bastaýǵa nıeti baryn aıtty.
«Kásipkerlik kýrstaryn oqyp, óz isimdi ashamyn, jaǵdaıymdy durystaımyn degen árbir azamatqa biz qoldaý bildirýimiz kerek. Oqytyp, úıretip, múmkindiginshe óz isin bastaýda qarjylyq máselelerin sheshýge de qolǵabys jasaýǵa bolady. Eń bastysy – adamda nıet pen áreket bolýy kerek», – dedi oblys ákiminiń orynbasary Meıirjan Myrzalıev.
Jetisaı aýdanyna jumys sapary barysynda birqatar otbasyna «Qamqorlyq» baǵdarlamasy aıasynda turmysta qajetti zattar úılestirildi.
Sonymen qatar Jetisaı aýdany ákimdiginde aýdan kásipkerleriniń kóshpeli úılestirý keńesi ótti. Jıynnyń maqsaty – aýdanda kásipkerlik salasynda ótken jyly atqarylǵan jumystar men aldaǵy josparymen tanysý, kásipkerlik, aýyl sharýashylyǵy salalarynda qolbaılaý bolǵan máselelerdiń sheshilý joldaryn qarastyrý, usynystardy talqylaý. Otyrysta Memleket basshysynyń bastamasymen qabyldanǵan «Qarapaıym zattar ekonomıkasy» salalaryn damytý baǵdarlamasy aıasynda atqarylyp jatqan birqatar jumystarǵa toqtalyp ótti.
Sondaı-aq óńir basshysynyń orynbasary Jetisaı aýdanynyń turǵyndaryn jeke máseleleri boıynsha qabyldady. Nesıe alý, kásipkerlik ashý, jumysqa ornalasý, aýyl sharýashylyǵy, jol, gazdandyrý, áleýmettik járdemaqymen qatar sapaly medıtsınalyq qyzmet alý máseleleri boıynsha ótinishterimen kelgen turǵyndardy jeke-jeke qabyldaǵan oblys ákiminiń orynbasary árbir ótinishti muqııat tyńdady. Qabyldaý barysynda tıisti basqarma men bólim basshylaryna tapsyrma júktedi.
