Túrkistan oblysy ákimdiginiń ókilderi Halyqtyq keńseniń jumysymen tanysty

TÚLKІBAS. QazAqparat – Túrkistan oblysyna qarasty aýdan ákimdikteriniń apparat basshylary men aqparattyq qaýipsizdik jáne memlekettik qyzmet kórsetý bólimderiniń basshylary Túlkibas aýdanyndaǵy Halyqtyq keńseniń jumysymen tanysty. Turǵyndarǵa sapaly qyzmet kórsetýge baǵyttalǵan keńse «Tsıfrlyq Qazaqstan» memlekettik baǵdarlamasy aıasynda ashylǵan, dep habarlaıdy QazAqparat tilshisi.

QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Túrkistan oblysy boıynsha departamentiniń uıymdastyrýymen ótken is-sharada keńseniń jumys isteý mehanızmi tanystyryldy. Óz kezeginde Túlkibas aýdany ákimi apparatynyń basshysy Erbol Ormanov halyqtyq keńsede ákimdikke qarasty 8 derbes bólim 95 túrli memlekettik qyzmet boıynsha «bir tereze» qaǵıdatyna sáıkes turǵyndarǵa qyzmet kórsetip jatqanyn aıtty. «Elbasymyz aıqyndap bergen «Tsıfrlyq Qazaqstan» baǵdarlamasyn júzege asyrýdyń 4 baǵyty bar. Sol baǵyttardyń úshinshisi - memlekettik organdar jumysynyń sapasyn arttyrý bolyp tabylady. Avtomattandyrylǵan júıemen jumys isteıtin keńsede azamattar burynǵydaı kóp ýaqyt joǵaltpaıdy. Eń bastysy, qyzmet túrleri joǵary sapada kórsetiletin bolady» - dedi Erbol Ormanov. Aýdandardyń ishinde alǵash ret Túlkibas aýdanynda ashylǵan halyqtyń keńseniń jumysyna rıza bolǵan semınarǵa qatysýshylar memlekettik qyzmet kórsetý baǵytyndaǵy atqarylyp jatqan jumystarǵa joǵary baǵalaryn berip, ózara tájirıbe almasty.