Túrkistan oblysy ákimdiginiń mańdaıshasyndaǵy jazý jańa ataýǵa ózgertildi
TÚRKІSTAN OBLYSY. QazAqparat - Túrkistan oblysy ákimdiginiń mańdaıshasyndaǵy jazý jańa ataýǵa ózgertildi. Ákimdiktiń sharýashylyq qyzmetkerleri bul jumysty bir kún ishinde atqaryp tastady, dep habarlaıdy QazAqparat tilshisi.
Sonymen Ońtústik Qazaqstan oblysyniń ákimdigi Túrkistan oblysynyń ákimdigi bolyp ózgertildi. Mundaı jańalyqty qala turǵyndary uıaly telefondaryna túsirip, áleýmettik jelide bólisti. Solardyń biri, shymkenttik turǵyn Іlııas Joldas bul ózgeriske qatysty óz pikirin bildirgen.
«Kóz aldymyzda Ońtústik Qazaqstan oblysy óship bara jatyr. Túrkistan saraıyna qarsy turǵan ákimshilik úıiniń mańdaıshasy aýysýda. Túrkistan oblysynyń ákimdigi. Bastaldy! Talaılarǵa tirek bolǵan, talaı elge tutqa bolǵan, qosh bol endi Ońtústik Qazaqstan oblysy! Sen tarıxtyń bir emes myń bólshegisiń! 100 jyldyq ǵumyryńdy myń jarym jyldyq tarıxy bar Túrkistanǵa ber!» dep jazady Іlııas Joldas.
Ózge mekemeler de endi birtindep ataýyn ózgertedi dep kútilýde.
