Túrkistan oblysy ákimdiginiń burynǵy basqarma basshysy men onyń orynbasary 8 jylǵa sottaldy
Túrkistan qalalyq sotynda QK-niń 189-baby 4-bóliginiń 2) tarmaǵynda kózdelgen qylmystyq quqyq buzýshylyqty jasaǵany úshin Túrkistan oblysynyń Qoǵamdyq damý basqarmasynyń buryńǵy basshysy men onyń orynbasaryna sot úkimi shyqty.
Eki azamat ta memlekettik fýnktsııalardy oryndaýǵa ýákilettik berilgen adam bola tura, ózderiniń qyzmet babyn paıdalanýmen ushtastyryp, ońaı jolmen paıda tabýdy kózdegen. Adamdar tobynyń aldyn ala sóz baılasýymen, senip tapsyrylǵan asa iri mólsherdegi bóten múlikti ıemdenip alyp otyrǵan.
2020 jylǵy 28 aqpannan bastap 2021 jylǵy 10 qarasha aralyǵynda Túrkistan oblysy ákimi apparatyna qarasty Іshki saıasat bólimderi arqyly ár túrli saladaǵy is-sharalarǵa, solardyń memlekettik satyp alý konkýrstaryna ózderiniń tanystary arqyly qatysyp, olardy utyp alyp, olardyń tarapynan shyn máninde jobalar oryndalmaǵanyn bile tura, bıýdjetten bólingen asa iri mólsherdegi aqsha qarajattaryn ıemdengen. Jalpy memlekettik bıýdjet qarajatynyń 229 532 581, 57 teńgesin talan - tarajǵa salyp, memleketke asa iri mólsherde zııan keltirgen.
Sot, is materıaldaryn tolyq zerdelep, taraptardyń ýájderin tyńdap, saraptamalardyń qorytyndylary, jábirlenýshi ókilimen men kýálardyń jaýaptaryna sáıkes sottalýshylardyń jasaǵan qylmystyq quqyq buzýshylyqtary tolyǵymen dálelin tapty degen qorytyndyǵa keldi.
Kúdiktilerdi taǵylǵan aıyptaý boıynsha kináli dep tanylyp, olarǵa belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyra otyryp, 8 jyl merzimge bas bostandyǵynan aıyrý túrindegi jaza taǵaıyndady.
Sottalǵandar jazalaryn qylmystyq-atqarý júıesiniń ortasha qaýipsiz mekemelerinde óteıtin bolady.
«Basqarma basshysy men onyń orynbasaryna qoldanylǵan bultartpaý sharasy ózgertilip, olar sot zalynan dereý qamaýǵa alyndy jáne úkim zańdy kúshine engenge deıin kúzetpen ustalady. Al, sottalýshy JShS-niń dırektory 189-baby 4-bóliginiń 2) tarmaǵy boıynsha belgili bir laýazymdardy atqarý nemese belgili bir qyzmetpen aınalysý quqyǵynan 7 jylǵa aıyra otyryp, 7 jyl merzimge bas bostandyǵynan aıyrý jazasyn taǵaıyndap, QK-niń 63-babyn qoldanyp, taǵaıyndalǵan jaza shartty dep sanaldy. Sebebi, sottalýshy memleketke keltirgen 73 800 000 teńge materıaldyq zalaldy tolyǵymen ótegen. Úkim zańdy kúshine engen joq. Úkimmen kelispegen tarap apellıatsııalyq shaǵym keltirýge quqyly» - delingen Túrkistan oblystyq sotyynyń baspasóz qyzmeti usynǵan aqparatta.