Túrkistan oblysy Abaı mereıtoıyna oraı Semeıdegi jańa meshit aýmaǵyn abattandyrýda
Qalalyq Aqparat ortalyǵynyń málimetinshe, uly aqynnyń 175 jyldyǵyna oraı Túrkistan oblysy Semeıdegi jańa meshit aýmaǵyn abattandyrýda. Delegatsııa atqarylǵan jumystarmen tanysýǵa jáne Abaı eline qurmet kórsetý maqsatynda keldi.
«Kezdesý qalalyq ákimdikte bastaldy. Onda jumys qorytyndylary men aldaǵy josparlar talqylandy. Otyrysqa Semeı qalasynyń basshylyǵy men Túrkistan oblysynyń ókilderi, metsenattar, ımamdar men kásipkerler qatysty. Sodan keıin delegatsııa meshitke baryp, júrgizilgen jumystarmen tanysty. Salynyp jatqan meshit aýmaǵynda búginde shyrshalar otyrǵyzylyp, quıma tastar tóseldi, balalar jáne sport alańdary ornatyldy. Qazirgi tańda jumystar 95%-ǵa oryndalǵan. Jaqyn arada munda 500 kólikke arnalǵan avtoturaq ta paıda bolady. Jalpy abattandyrý jumystaryn 20 qazanǵa deıin aıaqtaý josparlanyp otyr», - delingen habarlamada.
Keıin delegatsııa Abaı eskertkishine bardy. Túrkistan oblysynan kelgen qonaqtar uly oıshyldy eske alyp, monýment etegine gúl shoqtaryn qoıdy. Sondaı-aq delegatsııa ókilderi «Alash arystary» mýzeıine bas suqqan. Buryn osy ǵımaratta qazaq zııalylary men «Alash» partııasynyń ókilderi jınalǵan bolatyn. Ekspozıtsııada alashordashylardyń tarıhyna baılanysty kóptegen eksponattar usynylǵan.
Kezdesý sońynda delegatsııa ókilderi Semeı óńirinen kelgen qonaqtardy árdaıym qýana qarsy alatynyn atap ótip, pandemııanyń tezirek aıaqtalyp, semeılikterdiń qalypty ómirge oralýyn tiledi.
