Túrkistan oblysy 654 myń tonna aýylsharýashylyq ónimin eksporttady
TÚRKІSTAN. QazAqparat – Bıyl Túrkistan oblysynda 654 myń tonna aýylsharýashylyq ónimi eksporttaldy, dep habarlaıdy QazAqparat.
Búgin Túrkistan oblystyq máslıhatynyń kezekti elý ekinshi sessııasy ótti. Aımaq basshysy Ómirzaq Shókeev málim etkendeı, Túrkistan oblysy ekonomıkasynyń basty tiregi – aýyl sharýashylyǵynda bıyl 235,5 mlrd teńgeniń ónimi óndirilip, ósim 101,7% qurady. Álemde oryn alǵan karantındik rejımge qaramastan, óńirde jalpy 654 myń tonna ónim eksporttalyp, tabys kólemi 70,0 mln AQSh dollar boldy.
Túrkistan oblysy ásirese, iri qara mal etin eksportaý boıynsha respýblıkada 1-orynǵa ıe.
Eksport tabysyn jyl sońyna deıin 97,2 mln AQSh dollaryna jetkizý josparlanýda. Oblysta sondaı-aq, egin sharýashylyǵynyń egis kólemi 846,1 myń gektarǵa jetkizilip, 17,0 myń gektarǵa artqan. Qarqyndy baýlardyń kólemi 3,7 myń gektarǵa jetkizilip, júzimnen 100,0 myń tonna ónim alyndy. Jańadan 2,4 myń gektarǵa tamshylatyp sýǵarý júıesi endirilip, jalpy kólemi 20,0 myń gektarǵa jetti. Dıqandar tamshylatyp sýarý júıesiniń tıimdiligi arqasynda ónim kólemin arttyrǵan.
Oblysta sonymen qatar ınvestıtsııalyq sýbsıdııa baǵdarlamasy jańa baǵyttaǵy jobalarǵa iri ınvestorlar tartýǵa ońdy yqpalyn tıgizýde. 2019 jyly 1 524 jobaǵa memlekettik qoldaý kórsetilse, bıylǵy jyly 7 aıda 6,0 mlrd.teńgege 1433 jobaǵa qoldaý kórsetilgen. Ómirzaq Estaıuly oblysta aýyl sharýashyly salasynda úsh basym baǵyt qolǵa alynǵandyǵyn atap ótti. Ásirese, jańbyrlatyp sýǵarý ádisi men azyq-túlik beldeýin qalyptastyrý jobasy jáne úı irgelik sharýa qojalyqtaryn damytýǵa asa den qoıylyp otyr. Túrkistan qalasy aýmaǵynda azyq-túlik beldeýin qalyptastyrý jobasy aıasynda 31,7 mlrd.teńgeni quraıtyn 7 ınvestıtsııalyq jobalar iske asyrylýda. Aldaǵy ýaqytta qala aýmaǵynda 1458 sharýa qojalyǵyn 9 kooperatıvke biriktirý arqyly 11,0 myń ga alqapqa jańbyrlatyp sýǵarý mashınalaryn ornatý josparlanýda. Bul alqaptardan alynǵan joǵary sapaly mal azyqtyq ónimdermen (bıdaı, júgeri, jońyshqa) beldeýdegi kelesi iri ınvestıtsııalyq jobalardyń suranysy qanaǵattandyrylyp, óńirde azyq-túlik qaýipsizdigin qamtamasyz etýge jol ashylady.
