Túrkistan oblystyq sotynyń sýdıasy 5 jylǵa bas bostandyǵynan aıyryldy

NUR-SULTAN. QazAqparat – Eki aptada 23 adamǵa qatysty 17 aıyptaý úkimi shyǵaryldy. Bul týraly QR Sybaılas jemqorlyqqa qarsy is-qımyl agenttigi 1-shi departamentiniń asa mańyzdy ister jónindegi tergeýshisi Danııar Bıǵaıdarov málim etti, dep habarlaıdy QazAqparat.

«Eki apta ishinde Sybaılas jemqorlyqqa qarsy qyzmetpen buryn aıaqtalǵan qylmystyq ister boıynsha 23 adamǵa qatysty 17 aıyptaý úkimi shyǵaryldy, olardyń 15-i ártúrli deńgeıdegi basshylar. Bas bostandyǵynan 7 adam aıyryldy, beseýiniń bas bostandyǵy shekteldi, eselik aıyppul somasy 80 mln teńgeden astam eselik aıyppuldarǵa 10 adam tartyldy. Sonymen qatar, jymqyrý faktileri boıynsha - 4, alaıaqtyq úshin – 3, para bergeni úshin - 3, para alǵany úshin – 10 jáne qujattardy burmalaǵany úshin 2 adam jazaǵa tartyldy», - dedi D. Bıǵaıdarov Facebook paraqshasynda ótken onlaın brıfıngide.

Onyń sózine qaraǵanda, 27 qazanda Shymkent qalasy Qarataý aýdandyq sotynyń úkimimen Túrkistan oblystyq sotynyń azamattyq ister jónindegi alqa tóraǵasy Bekimbetov 5 jyl merzimge bas bostandyǵynan aıyryldy.

«Osy úkimmen «Azııa Stroı» JK bankrottyq basqarýshysy Erejepov 2 jyl 6 aı merzimge bas bostandyǵynan aıyryldy. Bekimbetov Erejepovten jeke kásipkerdiń qorytyndy esebi men taratý teńgerimin bekitý týraly sot uıǵarymyn oryndaýdy keıinge qaldyrý týraly azamattyq is boıynsha oń sheshim shyǵarǵany úshin 300 myń teńge somasynda para alý kúdigine ilindi», - dedi agenttik ókili.