Túrkistan oblystyq sotynyń alqa tóraǵasy tergelip jatyr

NUR-SULTAN. QazAqparat - Túrkistan oblystyq soty azamattyq ister jónindegi alqasynyń tóraǵasyna qatysty sotqa deıingi tergeý amaldary bastaldy. Bul týraly onlaın brıfıng barysynda QR Sybaılas jemqorlyqqa qarsy is-qımyl agenttigi 1-shi departamenti basshysynyń orynbasary Danııar Aqýan aıtty, dep habarlaıdy QazAqparat tilshisi.

«QR Sybaılas jemqorlyqqa qarsy is-qımyl agenttiginiń ortalyq apparaty Joǵarǵy sottyń ishki qaýipsizdik bólimimen birge Túrkistan oblystyq soty azamattyq ister jónindegi alqasynyń tóraǵasyna qatysty sotqa deıingi tergeý amaldaryn bastady. Ol bankrottyq basqarýshydan azamattyq is boıynsha oń sot sheshimin shyǵarǵany úshin 300 myń teńge somasynda para alý kúdigine iligip otyr. Qylmystyq is boıynsha ózge aqparattar QR Qylmystyq protsessýaldyq kodesiniń 201-babyna sáıkes jarııa etýge jatpaıdy», - dedi Danııar Aqýan.