Túrkistan oblystyq ІІD tirkeý-emtıhan bóliminiń 38 qyzmetkerine qatysty qylmystyq is sotqa ótti

ShYMKENT. QazAqparat - Túrkistan oblystyq ІІD ákimshilik polıtsııasy tirkeý-emtıhan bóliminiń 38 qyzmetkerine qatysty qylmystyq is sotqa jiberildi. Bul týraly búgin oblystyq sotta ótken brıfıngte málim boldy, dep habarlaıdy QazAqparat tilshisi.

Oblysyq sottyń sýdıasy Tamara Smaılovanyń sózinshe, qylmystyq is sotqa endi ǵana kelip túsken.

«Aldyn ala málimetter boıynsha, 38 tulǵaǵa qatysty is 1567 tomnan turady. Barlyǵyna kúzetpen ustaý bultartpaý sharasy qoldanylǵan. Qazirgi tańda sotqa 362 tom túsken», - deıdi sýdıa.

Brıfıngte belgili bolǵandaı, ishki ister qyzmetkerlerine uıymdasqan qylmystyq top qurǵan, sybaılas jemqorlyq qylmystaryn jasaǵan, para alǵan jáne ókilettiligin asyra paıdalanǵan degen birneshe baptarmen aıyptar taǵylyp otyr.

Esterińizge sala keteıik, 2016 jyldyń shilde aıynda  Oblystyq  ІІD ákimshilik polıtsııasynyń tirkeý-emtıhan bóliminde arnaıy  operatsııa júrgizilip, nátıjesinde basshysynan bastap 38 qyzmetker ustalǵan bolatyn. Ustalǵandarǵa uıymdasqan qylmystyq top quryp, oǵan jetekshilik etti, para aldy jáne berdi, qyzmet babyn asyra paıdalana otyryp, sybaılas jemqorlyq qylmystaryn jasady degen aıyptar taǵylyp otyr. Sondaı-aq, burynǵy polıtsııa qyzmetkerlerine qazaqstandyq jáne reseılik jalǵan nómirler men mórler jasady, ony paıdalandy  jáne jábirlenýshilerge  mıllıardtaǵan shyǵyn keltirdi degen kiná taǵylýda. Búgingi tańda osy qylmystardyń arqasynda memleketke baj salyǵyn tólemegen myńǵa jýyq kólik anyqtalyp, 4,4 mlrd teńge shyǵyn kelgeni belgili boldy.