Túrkistan meshitin tonamaq bolǵan adam qylmys ústinde ustaldy

ShYMKENT. QazAqparat - Túrkistan meshitin tonamaq bolǵan adam qylmys jasaý kezinde ustaldy. Ol osy qulshylyq ornynan buǵan deıin 10 myń teńge men turmystyq zatty urlap ketkeni belgili boldy. Bul týraly qalanyń prokýrory Rýslan Ábdiraıymov málimdedi, dep habarlaıdy QazAqparat HAA tilshisi.

Qala prokýrorynyń sózinshe, meshitten ustalǵan ury tek qulshylyq oryndaryn tonaýdy kásip etip júrgen. Ári buǵan deıin de Túlkibas aýdanynyń meshitin tonap, sotty bolypty. Al Túrkistandaǵy meshitti tonaǵany týraly óz jaýabynda moıyndaǵan.

«Tek meshitterge urlyqqa túsýdi kásip etken 30 jas shamasyndaǵy bul azamat keshe keshkisin kelesi bir meshitke urlyqqa túsý kezinde quryqtaldy. Bul adamǵa qatysty qazir sotqa deıingi tergep-tekserý bastaldy», - deıdi Rýslan Ábdiraıymov.

Prokýrordyń aıtýynsha osy kúni polıtseıler qala kóshelerinde turǵyndardy ashyq tonap júrgen taǵy bir kúdiktini qolǵa túsirgen.

«Ekinshi oqıǵa boıynsha 2 azamat kúsh qoldaný arqyly 25 jas shamasyndaǵy kelinshekti shalyp qulatyp, uıaly telefonyn tartyp alyp qashqan. Der kezinde polıtsııaǵa xabarlaýdyń nátıjesinde, tonaýshylardyń biri ustaldy. Kúdikti qamaýǵa alyndy, ekinshisi izdestirilýde», - deıdi Rýslan Ábdiraıymov.