Túrkistan men Shymkenttiń shyǵyndary arnaıy rezervten óteledi - Qarjy mınıstrligi

ASTANA. QazAqparat - Túrkistan men Shymkenttiń terrıtorıaldyq ózgeristerin iske asyrýǵa biraz qarjy qajet bolady. Ázirshe, ony Úkimettiń rezervinen alady, dep xabarlaıdy QazAqparat tilshisi.

QR Qarjy mınıstri Baqyt Sultanovtyń aıtýynsha, shuǵyl sharalarǵa jergilikti bıýdjetterdiń qarjysy da jumsalady.

«Bizde Úkimettiń rezervi bar. Aqshanyń bir bóligin sol jerden alamyz. Sosyn jergilikti bıýdjetter bar. Taǵy bóligin sodan alamyz. Respýblıkalyq bıýdjetti naqtylaý kezinde naqty sommany anyqtaımyz dep oılaımyn. Qazir anyq aıta almaımyn. Kúzde bıýdjetti naqtylaımyz. Oǵan deıin Úkimettiń rezervi men jergilikti bıýdjetterdi paıdalanamyz. Qarjy shuǵyl qajet bolyp jatsa, atalǵan eki jerden alyp otyramyz», - dedi B.Sultanov jýrnalısterge bergen suxbatynda.

Aıta keteıik, QR Prezıdenti Nursultan Nazarbaev Túrkistan oblysynyń paıda bolýyna baılanysty pikir bildirip, arnaıy qujatqa qol qoıǵan bolatyn. Atalǵan tarıhı oqıǵaǵa baılanysty vıdeony AkordaPress áleýmettik jelidegi paraqshasynda jarııalady.

«Búgin «Qazaqstan Respýblıkasynyń Ákimshilik-aýmaqtyq qurylysy týraly» Zańynyń toǵyzynshy babyna sáıkes, Shymkent qalasyna respýblıkalyq mańyzy bar qala mártebesin berý jáne oblys ortalyǵyn Túrkistan qalasyna kóshirý týraly Jarlyqqa qol qoıǵaly otyrmyn. Budan bylaı bul óńir Túrkistan oblysy dep atalatyn bolady. Osy ákimshilik aýmaqtyń qurylymyna ózgeris engizý arqyly bul óńirdiń órkendeýine tyń serpin berýdi kózdegen tarıhı qujat bolyp sanalady», - dep atap ótti Memleket basshysy.