Túrkistan men Shymkentte alkogol óndiretin jasyryn tsehtar anyqtaldy

TÚRKІSTAN. QazAqparat – Túrkistan oblysynda jalǵan esepke alý-baqylaý tańbalaryn qoldana otyryp, kontrafaktilik alkogol ónimderin óndiretin jasyryn tsehtar anyqtaldy. Bul týraly Qarjylyq monıtorıng agenttiginiń Telegram-kanaly jazdy, dep habarlaıdy QazAqparat.

Sýrrogat alkogol óniminiń negizgi bóligi kóbinese antısanıtarııalyq jaǵdaıda, astyrtyn tsehtarda qoldan jasalǵan. Halyqtyń ómiri men densaýlyǵy úshin asa qaýipti.

Túrkistan oblysy boıynsha QMA aýmaqtyq departamentiniń qyzmetkerleri jalǵan esepke alý-baqylaý tańbalaryn paıdalana otyryp, alkogol ónimin óndirý boıynsha eki tsehtyń qyzmetin toqtatty.

«Júrgizilgen jedel-tergeý sharalary barysynda Túrkistan jáne Shymkent qalalarynda ornalasqan jalǵa alynǵan qoıma úı-jaılarynda antısanıtarııalyq jaǵdaıda sýrrogat alkogol ónimin óndirý boıynsha eki jasyryn tseh uıymdastyrylǵany anyqtaldy», - dep habarlady Qarjylyq monıtorıng agenttigi.

Qazirgi ýaqytta sotqa deıingi tergeý amaldary júrgizilip jatyr.