Túrkistan men Almaty arasynda týrıstik poıyz qatynaıdy
TÚRKІSTAN. QazAqparat - Taıaý ýaqytta Túrkistan men Almaty qalasynyń arasynda júrdek poıyz baǵyty ashylady, dep habarlaıdy QazAqparat oblys ákiminiń baspasóz qyzmetine silteme jasap.
Bul týraly oblys ákimdiginde ótken kezdesýde belgili boldy. Óńirge kelgen «Turan ekspress» kompanııasy men «Turan.tv» telearnasynyń bas dırektory Roman Botabekov aldymen oblys ákimi Janseıit Túımebaevtyń qabyldaýynda bolyp, týrızmdi damytý baǵytynda pikir almasty. Oblys ákimi tarapynan qoldaýǵa ıe bolǵan kompanııa basshysy óńirdiń týrızmin damytýǵa úles qosatynyn aıtty.
«Túrkistannyń oblys ortalyǵy atanǵanyn qýanyshpen qabyldadym. Ózim Kentaýda týyp-óskenmin. Sondyqtan týǵan jerge qyzmet etýge, týrıstik áleýetin kóterýge úlesimdi qossam degen nıetpen kelip otyrmyn. Qarasha aıynan bastap Almaty men Túrkistan qalalary arasynda týrıstik poıyz baǵytyn ashpaqshymyz. Ekinshiden, ózim basqaratyn «Turan.tv» telearnasy arqyly Túrkistan oblysy men Túrkistan qalasynyń kórikti, shejireli oryndary týraly beınematerıaldar, reportajdar, fılmder ázirleımiz. Osy jumystarymyz arqyly Túrkistannyń týrızmin damytýǵa úles qosamyz degen oıdamyn. Sebebi, qazir saıahatshylarǵa keregi - jaıly kólik pen qoljetimdi aqparat», - deıdi Roman Botabekov.
Osyǵan oraı, búgin «Turan ekspress» kompanııasy men Túrkistan oblysynyń jolaýshylar kóligi jáne avtomobıl joldary basqarmasy, týrızm jáne syrtqy baılanystar basqarmasy jáne ishki saıasat basqarmasy arasynda áriptestik jáne iskerlik baılanys jóninde memorandýmǵa qol qoıyldy. Sonymen qatar, atalǵan basqarmalar men telearna arasynda da memorandým jasaldy.
Atalǵan poıyz Almatydan juma kúni shyǵyp, jeksenbi kúni keri qaıtady. Saıahatshy jolaýshylar qonaqúı izdemeı, osy poıyzda tynyǵyp, Túrkistandy eki kún aralaıdy. Ázirshe bul poıyz aptasyna 4 ret júrgizilse, keleshekte kún saıyn saparǵa shyǵady degen jospar bar. Sonymen qatar, atalmysh kompanııa Túrkistan men Shymkent qalalary arasynda kún saıyn qatynaıtyn poıyz baǵytyn ashýdy da qolǵa almaqshy. Ákimdikter tarapynan qoldaý tapsa, bul jospar da júzege aspaq.
