Túrkistan mektepterinde er balalar jáne olardyń ákelerimen kezdesý ótýde
TÚRKІSTAN. QazAqparat - «Murager» uldar keńesi Túrkistan qalasyndaǵy №9 mektep-gımnazııada joǵary synyptaǵy er balalarmen jáne olardyń ákelerimen kezdesý ótkizdi, dep habarlaıdy QazAqparat.
Túrkistan qalasy ákiminiń baspasóz qyzmetinen málim etkendeı, mektep-gımnazııanyń 8-11-synyptarynda oqıtyn 150 er bala jáne olardyń ákeleri qatysqan jıynda qalalyq bilim bóliminiń ádiskeri J.Seralıeva, ıývenaldy polıtsııa maıory Sh.Tilegenov, polıtsııa kapıtany E.Qulbaev pen el aǵalary qylmystyń aldyn alý, tárbıe jóninde oı qozǵady.
Atalmysh sharada uldar tárbıesi, olardyń tártibi, meıirimdiligi, bir-birine degen qamqorlyǵy jóninde keleli áńgimeler aıtyldy. Sondaı-aq árbir bozbala keleshekte eldiń naǵyz patrıotyna aınalýy tıistigi týraly pikirler jetkizildi. Jıynǵa qatysýshy mamandar buzaqylyqtyń túbi qurdym men túrme ekenin shegelep atap ótti.
Sondaı-aq osy kúni №16 jalpy orta mektebinde «Mamandyqqa saıahat» taqyrybynda trenıng ótti. Oǵan 9-10 synyp oqýshylary men bilikti mamandar qatysty. Balalardyń minez-qulqyna baılanysty psıhologııalyq saýalnama júrgizilip, mamandyqqa baǵdarlaý boıynsha baıandama oqyldy.
Budan bólek, Túrkistandaǵy J.Edilbaev atyndaǵy №18 mektep-gımnazııasynda «Búgingi jetkinshek - erteńgi azamat» taqyrybynda oqýshylardyń aqsaldarmen, qalalyq ishki ister basqarmasynyń qyzmetkerlerimen kezdesýi ótti. Al №31 jalpy orta mektebinde 10-11-synyp oqýshylary «Meniń tańdaýym - Hanafı Mázhaby» taqyrybynda din ókilimen kezdesip, psıhologııalyq trenıngke qatysty.
№11 jalpy orta mektebinde joǵary synyp oqýshylary arasynda «Jasóspirimder arasynda quqyqbuzýshylyqtyń aldyn alý» taqyrybynda qalalyq ishki ister basqarmasynyń qyzmetkerlerimen zań saǵaty uıymdastyrylyp, álimjettik pen buzaqylyqtyń aldyn alý máselesi talqylandy.
«Mundaı jıyndar Túrkistandaǵy ózge mektepterde de jalǵasyn tabady», - delingen qala ákimdiginiń baspasóz habarlamasynda.
