Túrkistan mańyndaǵy 7700 gektar aýmaqta jasyl beldeý qurylady
TÚRKІSTAN. QazAqparat – Túrkistan qalasynyń Bas josparyna sáıkes, shahar aınalasynan 7 700 ga «Jasyl beldeý» qurý josparlanǵan. Ótken jyly 2300 gektar jer ıgerilip, 1 mln-nan astam ár túrli kóshet otyrǵyzylǵan, dep habarlaıdy QazAqparat tilshisi.
Oblystyq ákimdiktiń málimetinshe, kútip-baptaý men qorǵaý jáne ósimin molaıtý jumystary jalǵasýda. Qazirgi tańda aımaqta 3 mln 131 myń gektar ormandy dala jer bar. Onyń ishinde ormanmen kómkerilgen alqaby 11 myń gektarǵa ulǵaıyp, 1 mln 615 myń gektarǵa jetti. Orman qory jerleriniń shekaralaryn anyqtaý men memlekettik aktilerdi sáıkestendirý jumystary júrgizilgen. Al, ótken jyly memlekettik orman qory jerlerine mádenı kóshetter men sekseýildiń tuqymy sebilgen. Josparǵa sáıkes, kútip-baptaý men tolyqtyrý jáne ormannyń tabıǵı urpaqtanýyna yqpal jasaý sharalary atqarylǵan. Aǵashtardy kesýge qarsy kúres sharalaryn júrgizý aıasynda orman kúzeti qyzmetkerlerimen 1 000 jýyq reıdtik is-shara uıymdastyrylyp, 355 zańbuzýshylyq faktisi anyqtalǵan. Zańbuzýshylarǵa 7 mln 671 myń teńge ákimshilik aıyppul salynǵan. Bul jumystar oblys ákimdigimen birlesken is-shara jospary retinde bekitilgip, turaqty túrde júrgizilýde.
Aıta keteıik, búginde óńirde 124 jergilikti mańyzǵa ıe balyq sharýashylyǵy sý aıdyny bar. Onyń ishinde 68 sý aıdyny oblys ákimdiginiń balyq sharýashylyǵyn júrgizýge jaramdy sý aıdyndarynyń tizbesine engizilip, 9 sý aıdyny 7 tabıǵat paıdalanýshyǵa bekitilip berilgen. 59 sý aıdyny rezervke alynǵan. Sondaı-aq, oblystaǵy 28 ańshylyq alqaptyń 15-i tabıǵat paıdalanýshylarǵa bekitilip berilgen. Sonymen qatar, Syrdarııa ózeniniń boıynda arnaıy qurylǵan tuqymbaqtaǵy Buhar buǵylarynyń sany 158 basqa jetken. Sozaq orman sharýashylyǵyndaǵy tuqymbaqqa Almaty oblysynda ornalasqan «Altyn Emel ulttyq parkinen 20 bas qaraquıryq pen 20 bas qulan ákelý jumystary uıymdastyrylýda.
