Túrkistan mańynda 63 mlrd teńgeniń ınvestıtsııalyq jobasy júzege asyrylady

TÚRKІSTAN. QazAqparat – Túrkistan oblysynyń ákimi Ómirzaq Shókeev Túrkistan qalasynyń aýmaǵynda «Azyq-túlik beldeýin qalyptastyrý aıasynda iske asyp jatqan jobalarmen» tanysty. Qalada «Azyq-túlik beldeýi» qalyptastyrylatynyn atap ótti, dep habarlaıdy QazAqparat tilshisi.

Jańbyrlatyp sýarý ádisin endirýge bel býǵan sharýashylyqtardyń biri «Yntymaq agro XXI» JShS-i 782 ga jerge bıdaı men júgeri egýdi qolǵa alǵan. Sharýalarmen kezdesken óńir basshysy mundaǵy jas mamandardy jumysqa tartyp, jańa jobany júzege asyryp jatqandardyń betalysyna oń baǵasyn berdi.

«Túrkistannyń aınalasyna kanaldar qazylyp, sý keldi. Jańbyrlatyp sýarýdyń tıimdiligin túsingen sharýalardyń qatary kóbeıgeni qýantady. Aptap ystyqta yrysyn qara jerden izdegen sharýalar mezgili jetkende beınetiniń zeınetin kóredi. Jappaı júrgizilgen «Jasyl beldeý» shańdy jel men daýyldan qorǵaný úshin tabıǵı tosqaýyl retinde jasalýda. Jasyl jelekke bólenip, qaladaǵy aýany tazartyp, klımatty jumsartady», – dedi Ómirzaq Shókeev.

Túrkistan dalasyna aǵyn sý kelip, keń alqaptardyń arnasy keńigeli beri turǵyndar jerdi tıimdi paıdalanýǵa kóshken. Mundaı ilkimdi iske kórshi óńirler de qyzyǵýshylyq tanytyp otyr.

Oblys ákimimen kezdesken sharýalar jańbyrlatyp sýarý tásiliniń artyqshylyqtaryn túsinip, qyr-syrymen tanysýǵa Jambyl oblysynyń sala mamandarynyń arnaıy kelgenin jetkizdi. Bul óz kezeginde jańa tehnologııanyń tıimdiligin paıdalanyp, násibin kásipten taýyp júrgen sharýalar qatarynyń kóbeıýine yqpal etip otyr. Al, «SPK-SAURAN» AShÓK jańbyrlatyp sýarý tehnologııasyn 650 ga jerge endirip, 10 myń basqa arnalǵan bordaqylaý alańyn salýdy qolǵa alǵan.

Oblystyq aýyl sharýashylyǵy basqarmasynyń málimetinshe, jergilikti sharýalar aýyl sharýashylyǵy kooperatıvin qurýda. Olar aryq qazyp, sý ákelýdiń tıimsiz ekenin túsinip, AQSh-tan jańbyrlatyp sýarý qondyrǵysyn aldyrtyp jatyr. Arys – Túrkistan kanaly arqyly sý birneshe júıemen keledi. Úlken basseın salynyp, qondyrǵylarǵa qubyr arqyly sý quıylyp turady. Osylaısha agronomdar sýdy úsh esege únemdeıdi. Tehnıkanyń qunynyń 50%-yn memleket sýbsıdııa retinde tólep beredi. Myńdaǵan gektar alqap sýsyz qýaryp, osy ýaqytqa deıin bos jatqan jerlerdi qaıta jandanýynan Túrkistan qalasynyń aınalasynda azyq-túlik beldeýi quryldy.

Keshendi jospar boıynsha qala mańynda 63 mlrd teńgeniń 7 iri ınvestıtsııalyq jobasy júzege asyrylady dep josparlanyp otyr.