Túrkistan kóshelerine alǵash ret «Sergek» beınebaqylaý kamerasy qoıyla bastady
Jol boıyna sońǵy úlgidegi beınebaqylaý kameralary ornatylýda.
Mundaǵy basty maqsat – jol qozǵalysy erejesiniń buzylýyna jol bermeý, jol-kólik oqıǵasynyń sanyn azaıtý.
Osy baǵytta Túrkistan qalasynyń kólik kóp júretin oryndarynda 10 «Sergek» avtomatty qurylǵysy ornalastyrylyp, 5 qańtardan bastap óz qyzmetin atqarýda.
Naqtyraq aıtsaq, Táýke han kóshesinde - 3, S.Qojanov kóshesinde - 2 «Sergek» beınebaqylaý kamerasy qoıylǵan. Al Baıburt, B.Sattarhanov, Qazybek bı kóshelerinde, Qyzylorda tasjoly boıynda, Qazaqstanǵa 30 jyl dańǵylyna bir danadan ornatyldy.
Túrkistan oblysy PD Ákimshilik polıtsııa basqarmasy bastyǵynyń orynbasary polıtsııa polkovnıgi Ǵalymjan Esimovtiń aıtýynsha, bul qurylǵyny ornatýdyń negizgi sebebi - qaýipsizdiktiń barynsha joǵary deńgeıin qamtamasyz etý jáne quqyq buzýshylyqtardy avtomatty túrde fotobeınetirkeý júıelerine engizý.
«Sergek kameralary ruqsatty jyldamdyqty arttyrý, qyzylǵa ótý, jol belgileri men jolaqtarynyń talaptaryn buzý, ruqsat etilmegen jerde toqtaý men turý jáne avtobýs jolaǵymen júrý sııaqty ereje buzýshylyqtardy tirkep, kólik ıesine aıyppul jazyp bere alady. Máselen, osy «Sergek» qurylǵysy ornatylǵan 2 kúnniń ishinde jyldamdyqty asyrý boıynsha 25 ákimshilik quqyq buzýshylyq anyqtalyp, júrgizýshilerge 500 000 teńgege jýyq aıyppul salynǵan. Jalpy aıta ketetin jaıt, jol apaty saldarynan 2020 jyly qaza tapqandar sany ótken jylmen salystyrǵanda 46 paıyzǵa azaıǵan. Al, jaraqat alǵandar 115-ten 82-ge kemigen. Kórsetkishterdiń bulaı tómendeýine osy ornatylyp jatqan beınebaqylaý kameralarynyń da septigi tıip otyr. Sondyqtan birinshi kezekte ózińiz ben ózge de júrgizýshi, jolaýshylardyń ómiri úshin jol erejelerin saqtap júrińiz. Asyqpańyz, jyldamdyqty asyrmańyz»,- dep atap ótti ol.