Túrkistan kóshelerinde aýyr júk kólikterine júrýge tyıym salyndy
TÚRKІSTAN. QazAqparat – Túrkistanda aýyr júk kólikterine qala kóshelerinde júrýge tyıym salyndy. Bul másele qala ákimi Rashıd Aıýpovtyń qatysýymen ótken májilis kezinde aıtyldy, dep habarlaıdy QazAqparat tilshisi.
Májilistiń kún tártibinde 1-sektor aýmaǵynda atqarylyp jatqan jumystar men «Altyn aımaq» aýmaǵyndaǵy káriz júıeleriniń júrgizilýi, aýyr júk kólikteriniń qala kóshelerindegi qozǵalysyn retteý men qala kólemindegi ortasha jáne kúrdeli jóndeý jumystary júrgiziletin avtokólik joldarynyń jaıy talqylandy.
«Qamqorlyq» bastamasy aıasynda júrgizilip jatqan jumystardyń barysy baıandaldy. Infraqurylym jáne kommýnıkatsııalar bóliminiń basshysy N.Jarasovtyń aıtýynsha, ıAssy móltek aýdany, Yjdyhat turǵyn úı massıvin sarqyndy sý júıesimen qamtamasyz etý baǵytynda da tıisti jumystar atqarylýda. Qazirgi tańda atalǵan nysannyń joba-smeta qujattary ázirlenip, saraptamadan ótkizýge tapsyrylǵan. Nysannyń saraptama qorytyndysyn alý 2020 jyldyń sáýir aıynda josparlanyp otyr.
Al, qalalyq Polıtsııa basqarmasynyń Ákimshilik polıtsııa bóliminiń bastyǵy Q.Eshmanov qaladaǵy aýyr júk kólikteriniń qala kóshelerimen qozǵalysyn retteý máseleleri týraly baıandady. Onyń málimetinshe, «Túrkistan – qaýipsiz qala» baǵdarlamasy aıasynda Túrkistan qalasy B.Sattarhanov kóshesimen júk kólikteri kóptep júrgendikten jol qatty lastanýda. Osyǵan baılanysty qurylys materıaldaryn tasymaldap júrgen júk kólik júrgizýshilerine QR ÁQBtK-niń 630-babyna sáıkes, 648 hattama toltyrylǵan. Jol erejesin buzǵandarǵa 1 813 000 teńge kóleminde aıyppul salynǵan.
Sonymen qatar, úgit-nasıhat jumystarynyń nátıjesinde tas jol men qurylys nysandary arasynda 14 kólik jýý oryny ashylǵan. Júk kólikteri dóńgelekterin sol jerde tazalap shyǵýǵa múmkindik qarastyrylyp otyr. Júk avtokólikterdiń áýejaı nysanyna qurylys zattaryn tasymaldaý baǵytyn anyqtaý maqsatynda aldaǵy ýaqytta Oranǵaı aýylynda ornalasqan asfalt zaýytynyń temir jol tuıyǵynan, «Kentaý-Túrkistan» tas jolymen Qosqorǵan, Shaǵa aýyldary arqyly áýejaı nysanyna qurylys materıaldaryn tasymaldaýy usynylǵan.
Jıyn barysynda qala kólemindegi ortasha jáne kúrdeli jóndeý jumystary júrgiziletin avtokólik joldaryn zerdeleý baǵytynda júrgizilip jatqan jumystardyń barysy barysy da aıtyldy.
