Túrkistan: kópbalaly otbasylarǵa 1345 grant bólindi
TÚRKІSTAN. QazAqparat - Bıyl kópbalaly jáne áleýmettik kómek alatyn otbasydan shyqqan balalarǵa QR Ulttyq qordan bólingen qarajatqa 5 myń grant taǵaıyndalyp otyr. Sonyń ishinde Túrkistan oblysyna 1345 grant bólingen, dep habarlaıdy QazAqparat óńir basshysynyń baspasóz qyzmetine silteme jasap.
Granttarǵa ótinimder boıynsha konkýrs 5-10 tamyz aralyǵynda ótedi. Bul týraly Túrkistan oblysy óńirlik kommýnıkatsııalar qyzmetinde ótken brıfıngte oblystyq adamı əleýetti damytý basqarmasy basshysynyń mindetin atqarýshy Ardaq Sadyqova málimdedi.
«QR Ulttyq qorynan 2019-2020 oqý jylyna arnalǵan nysanaly transfert esebinen kópbalaly jáne az qamtylǵan otbasylarynyń balalary úshin joǵary bilimdi mamandar daıarlaýǵa memlekettik bilim berý tapsyryspen joǵary oqý oryndary belgilenip otyr. Belgilengen joǵary oqý oryndarynyń ishinde «Qazaq Ulttyq agrarlyq ýnıversıteti» AQ, S.Seıfýllın atyndaǵy qazaq agrotehnıkalyq ýnıversıteti, Q.A.ıAsaýı atyndaǵy halyqaralyq qazaq-túrik ýnıversıteti, M.Áýezov atyndaǵy Ońtúistik Qazaqstan memlekettik ýnıversıteti, Ońtústik Qazaqstan memlekettik pedagogıkalyq ýnıversıteti, Abaı atyndaǵy Qazaq Ulttyq ýnıversıteti, Qazaq memlekettik qyzdar pedagogıka ýnıversıteti, Syrdarııa ýnıversıteti, «Ońtústik Qazaqstan medıtsına akademııasy» AQ bar», – dedi A. Sadyqova.
Grant qarajaty transfert arqyly jergilikti ákimdikterge beriledi. Olar ózderiniń qajettiligin eskere otyryp, naqty mamandyqtar tizbesin anyqtap, grant beredi. Konkýrsqa qatysý úshin talapker nysanaly topqa jatqanymen qatar, ulttyq biryńǵaı testiniń shekti balyn jınaýy qajet.
Qoja Ahmet ıAsaýı atyndaǵy Halyqaralyq qazaq-túrik ýnıversıtetiniń oqý-ádistemelik isi jónindegi prorektory Ó.Úmbetovtyń aıtýynsha, 2019 jylǵy maýsym aıynda ótkizilgen UBT-dan shekti ball jınaý – konkýrsqa qatysýdaǵy negizgi shart bolyp sanalady. Ulttyq joǵary oqý oryndaryna túsý úshin talapkerler testileý nátıjesi boıynsha keminde 65 ball, basqa joǵary oqý oryndaryna keminde 50 ball, «pedagogıkalyq ǵylym» baǵyty boıynsha oqý úshin keminde 60 ball, densaýlyq saqtaý salasy boıynsha keminde 65 ball jınaýy qajet. Jalpy, osy granttarǵa ıe bolý úshin úmitkerler tamyzdyń 5-10 aralyǵyndaǵy kelesi konkýrsqa tapsyrý úshin jergilikti atqarýshy organdarǵa ótinish bere alady. Bul arada ákimdikter granttardy UBT balyna jáne grant sanyna qaraı taǵaıyndaıdy jáne jeńimpazdardyń tizimin jergilikti BAQ-da jarııalaıdy. Barlyq nysanaly grant ıegerlerine ádettegideı 20 949 teńge kólemindegi shákirtaqy taǵaıyndalady. Sonymen qatar, demalys kezinde jylyna 2 ret jol ótemaqysy tólenedi.
