Túrkistan kógildir otynmen tolyq qamtylady – Ómirzaq Shókeev
TÚRKІSTAN. QazAqparat – Túrkistan kógildir otynmen tolyq qamtylady. Bul týraly Túrkistan oblysynyń ákimi Ómirzaq Shókeev aptalyq apparattyq májiliste atap ótti, dep habarlaıdy QazAqparat tilshisi.
Aımaq basshysynyń sózinshe, qazir shahardyń teń jartysynan astam aýmaǵynda gaz qubyrlary júrgizilip qoıǵan. Quzyrly mekeme qyzmetkerlerine halyqqa kómirden góri, kógildir otyndy qoldanǵan ekologııalyq ári qarjy jaǵynan tıimdi ekendigin túsindirý jáne qamtamasyz etý tapsyrylǵan.
«Qalany sektorlarǵa bólip, jylytý maýsymyna daıyndyqty kúsheıtý kerek. Túrkistan qalasyn gazben qamtý, kógaldandyrý jáne ekologııalyq jaǵdaıyn jaqsartýdy myqtap qolǵa alý qajet. Arys tájirıbesin qoldanyp, sapasyna qatysty talapty da dál sol deńgeıde júrgizýimiz kerek»,- dedi Ómirzaq Shókeev.
Májiliste sondaı-aq, Arys qalasyndaǵy qurylys júrgizilgen jáne zardap shekken úılerdi qaıta qalpyna keltirý jumystary jaıly sońǵy málimetter aıtyldy. Sala mamandarynyń sózinshe, qarasha aıynyń basynda qujat rásimdeý jáne ishki árleý jumystary aıaqtalýy tıis. Endigi kúsh Túrkistan qalasyn kórkeıtýge baǵyttalmaq. Máselen, ótken demalys kúnderi Túrkistan oblysynda jalpyhalyqtyq senbilik ótip, qala aýmaǵynda 22 myńǵa jýyq kóshet otyrǵyzylǵan. Óńirdi kógaldandyrý maqsatynda Túrkistan qalasynyń aınalasynda «Jasyl beldeý» qalyptasyp keledi. Jalpy Túrkistan oblysy boıynsha 1,3 mıllıonnan astam aǵash egiledi. Májiliste ekologııalyq ahýal da sóz boldy. Ómirzaq Shókeev óńirdi kúl-qoqystan tazartyp, tazalyqty saqtaýdy jergilikti basshylarǵa kózden tasa qaldyrmaı, qadaǵalaýdy tapsyrdy. Jıynda oblystaǵy orman jáne ańshylyq sharýashylyǵyna qatysty máseleler ortaǵa salyndy. Mamandar sekseýildiń sırep bara jatqanyna alańdaýly. Bul máselege qatysty aldaǵy ýaqytta naqty sharalar júzege asyrylatyn boldy.
