Túrkistan: Keles aýdanynda jańa demalys orny ashylady
NUR-SULTAN. QazAqparat - Túrkistan oblysy Keles aýdanynyń turǵyny Nurlan Júzbaev Birlik aýyldyq okrýginen jańadan demalys ornyn ashýdy josparlap otyr. Qazirgi tańda daıyndyq jumystary júrgizilýde, dep habarlaıdy oblystyq ákimdiktiń baspasóz qyzmeti.
Menshik ıesiniń bul jospardy júzege asyryp kele jatqanyna 2 jyldaı ýaqyt bolǵan. Túrkistan oblysy ákiminiń baspasóz qyzmeti aýdanda uıymdastyrǵan press-týr barysynda BAQ ókilderi jańadan qurylyp jatqan demalys ornynda bolyp, atqarylyp jatqan jumystarmen tanysty.
«Baıbol-ata» sharýa qojalyǵynyń menshiginde 70 gektar jer bar. Onyń 10 gektaryn baý-baqsha, 20 gektaryn kól alyp jatyr. Qalǵan 30-40 gektar jer toǵaı kúıinde saqtalǵan. Qojalyq ıesi bul jerdi demalys ornyna aınaldyrý úshin shetelden arnaıy ań-qus pen balyq satyp alyp, olardy ósirip, kóbeıtip jatqanyn aıtady.
«Demalýshylarǵa qarý asynyp, toǵaı aralap, ań-qus atý úshin arnaıy jer daıyndap jatyrmyz. Máselen, Reseıden úırek pen qazdyń birneshe túrlerin aldyrttyq. Qazir olardy ınkýbatsııalyq jolmen kóbeıtý jumystarymen aınalysyp jatyrmyz. Balapan ashyp shyqqandaryn toǵaıǵa jiberip otyramyz. Sondaı-aq, 2 myńnan astam jabaıy qoıan alyp keldik. Jalpy osy jobaǵa búginge deıin 150 mln. teńgege jýyq qarjy jumsadyq», - dedi Nurlan Júzbaev.
20 gektar aýmaqty alyp jatqan kól jeti bólikke bólingen. Onda Vengrııadan satyp alynǵan 160 myń dana balyq jiberilipti. Onyń 50 myńy sazan, 40 myńy amýr aqmarqasy, 20 myńy dóńmańdaı, 50 myńy tuqy balyqtary.
Aıta keteıik, qazir onda 20 adam jumys isteıdi. Qaýipsizdik úshin nysan qorshalyp, aınalaǵa beınekameralar ornatylǵan. Joba jospar boıynsha júzege assa, aldaǵy 2-3 jylda demalýshylar úshin esik ashylady.
