Túrkistan qalasynyń qurylysy men sáýleti úsh baǵytta júrgiziletin bolady
TÚRKІSTAN. QazAqparat - Túrkistanda oblys ákimi Ómirzaq Shókeevtiń tóraǵalyǵymen oblys ortalyǵyn jan-jaqty damytý týraly apparat májilisi bolyp ótti. Jıynda Túrkistan qalasynyń ákimi Álipbek Óserbaev shahardaǵy qurylys jumystarymen tanystyrdy, dep habarlaıdy QazAqparat tilshisi.
Shahar basshysynyń aıtýynsha, qalanyń qazirgi tańdaǵy jer aýmaǵy 19,6 myń gektardy quraıdy. Al, halyq sany 165 myń adamǵa jetken. Bas josparǵa sáıkes qala qurylysy men sáýleti úsh baǵytta júrgiziletin bolady. Aldymen Qoja Ahmet ıAsaýı kesenesiniń mańyndaǵy «Tarıhı aımaqty» qaıta jańǵyrtý bolsa, ekinshi «Rýhanı mádenı ortalyqty» damytý. Úshinshi, 750 gektardy quraıtyn ákimshilik-iskerlik ortalyǵyn salý.
Sondaı-aq, shahar basshysy memleket muqtajdyǵy úshin alynyp jatqan jer telimderi men qalanyń ınfraqurylym, jylý, gaz, aýyz sý júıesiniń jaıyna toqtaldy. Jıynda oblystyq qurylys basqarmasynyń basshysy Toqtar Úsipálıev Túrkistan qalasyndaǵy qurylys jumystarynyń jaıyn baıandady. Onyń aıtýynsha, Elbasynyń Túrkistan qalasyn damytý týraly tapsyrmasyna sáıkes 29 nysannyń qurylysy óńirler, ulttyq kompanııalar jáne bıznes ókilderine bekitilip otyr.
Sondaı-aq basqosýda Túrkistan oblystyq jolaýshylar kóligi jáne avtomobıl joldary basqarmasynyń basshysy Bekzat Tilegenov oblys ortalyǵyndaǵy jol qurylysymen tanystyrdy. Jospar boıynsha aǵymdaǵy jyly 974,2 shaqyrym jol men kósheler qurylys-jóndeý jumystarymen qamtylady dep kútilýde. Onyń bıyl 653,2 shaqyrymy paıdalanýǵa beriletin bolady.
Túrkistan qalasynyń jaı-kúıi jaıly baıandamalardy tyńdaǵan oblys basshysy shahardaǵy tazalyq, káriz jáne sý júıeleri men jol sapasyn synǵa alyp, máseleni tezdetip sheshýdi tapsyrdy.
