Túrkistan qalasynyń qurylysy men sáýleti úsh baǵytta júrgiziledi
TÚRKІSTAN. QazAqparat - Túrkistannyń 2018 jylǵy jalpy óńirlik ónimi 74 mlrd 803 mln teńgeni qurap, 2017 jylmen salystyrǵanda 4,7 paıyzǵa artqan. Bul jan basyna shaqqanda 452 myń teńgeni qurap, 12 paıyzǵa kóbeıgenin kórsetedi. Qala turǵyndarynyń aldynda 2018 jyly atqarǵan jumystary jóninde esep bergen shahar basshysy Álipbek Óserbaev osy máselelerge toqtaldy, dep habarlaıdy QazAqparat tilshisi.
Qala ákiminiń esep berý jıynyna oblys ákimi Janseıit Túımebaev pen jergilikti turǵyndar jáne BAQ ókilderi qatysty. Shahar basshysynyń sózinshe, Túrkistandy «Qazaqstannyń rýhanı ortalyǵy retinde qalyptastyrý maqsatynda Bas josparǵa sáıkes qala qurylysy men sáýleti úsh baǵytta júrgiziletin bolady.
«Birinshi 88,7 gektar jerge ornalasqan Q.A.ıAsaýı kesenesiniń mańyndaǵy «Tarıhı aımaqtaǵy» 18 nysandy qaıta jańǵyrtý josparlanǵan. Ekinshisi «Rýhanı-mádenı ortalyq» aımaǵynda 98 gektar jerge «Uly dala eli» keshenin, «Qoja Ahmet ıAsaýı murajaıy», «Amfıteatr», «Shyǵys monshasyn», «Sý burqaq», «Qabyldaý Ortalyǵy» men «Túrki halyqtarynyń ǵylymı kitaphanasy» salynady. Úshinshi 700 gektardy quraıtyn ákimshilik-iskerlik ortalyǵynyń aımaǵynda oblystyq ákimdiktiń, basqarmalar men departamentter ǵımarattarynyń jáne turǵyn úı keshenderiniń qurylysy bastalyp, Medıa ortalyǵy men Oqýshylar saraıynyń, sport, mádenı keshenderiniń, «Kongress Holl» men áleýmettik nysandardyń irgetasy qalandy. Osylaısha jádiger qalamyz óziniń tarıhı qundylyǵyn saqtaı otyryp, zamanaýı úlgide qaıta jańǵyrtylatyn bolady», - dedi qala ákimi.
Jıyn barysynda jergilikti halyq kókeıdegi túrli túıtkilderin ortaǵa salyp, máselege qatysty tıisti jaýaptaryn aldy. Qala turǵyndary kótergen máseleniń basym bóligi kommýnaldyq qyzmet pen qoǵamdyq kólik jáne qoǵamdyq oryndar men bazarlardaǵy tazalyqqa baılanysty boldy. Oblys ortalyǵynda atqarylǵan jobalar men josparǵa qanyqqan aımaq basshysy Janseıit Túımebaev halyqty Túrkistannyń mártebesin kóterý baǵytynda birlese jumys isteýge shaqyrdy.
«2018 jyl oblys turǵyndarynyń esinde Túrkistan oblysynyń qurylýymen este qalǵany málim. Er Túriktiń besigi sanalatyn qutty meken - Túrkistan oblysynyń qurylýy Rýhanı jańǵyrýdaǵy basty, qundy sheshimderdiń biri. Aldaǵy ýaqytta, Elbasynyń tapsyrmasyna sáıkes Túrkistan qalasyn jalpy Túrki áleminiń mádenı-rýhanı ortalyǵy retinde damytý baǵytynda kóptegen jumystar atqarylatyn bolady. Bul jumystar óz kezeginde Túrkistan oblysynyń túlep, damýyna óz úlesin qosatynyna senimdimin. Qazirgi tańda óńirdegi tarıhı jerlerdi tereń zertteý úshin tıisti jospar jasaldy. Onyń ishinde birinshi kezekte turǵan jerdiń biri, osy sizder turyp jatqan Túrkistan qalasy. Bul sharýalar halyqaralyq uıymdarmen uıymdasa atqarylatyn bolady. Sebebi, Túrkistan - Qazaqstannyń ǵana emes, adamzat tarıhynda orny bar meken», - dedi aımaq basshysy Janseıit Túımebaev.
