Túrkistan qalasynyń gastronomııalyq kartasy tanystyryldy
Gastrofestıvalde qalanyń 25-ten astam mekemesi ulttyq, jergilikti taǵamdar jáne kóshe taǵamdaryn ázirledi. Odan bólek, shara qonaqtarynyń desertter men túrli sýsynnyń dámin kórý múmkindigi boldy.
Festıval qatysýshylaryna qoıylǵan talaptardyń biri dástúrli taǵamdardy avtorlyq retsept boıynsha kóshe taǵamdary formatynda daıyndaý. Sondaı-aq, mázirde álemdik deńgeıdegi as túrleri de boldy.
Atalǵan sharany ótkizýdegi maqsat - óńirdegi qoǵamdyq tamaqtaný salasyn damyta túsip, gastronomııalyq brend qalyptastyrýǵa múmkindik jasaý.
«Jergilikti halyqtyń gastronomııalyq ónerin nasıhattaýǵa baǵyttalǵan festıval óńirimizdiń sheber aspazdarynyń dástúrin odan jalǵastyrýǵa oń serpin berý maqsatynda uıymdastyrylyp otyr»,-dedi Túrkistan oblysy ákiminiń orynbasary Sáken Qalqamanov sharanyń ashylý saltanatynda.
Aspazdyq óner festıvaline 2 myńnan astam adam qatysty. Sol sııaqty as ázirleýden bólek, kontsert, oıyndar, baıqaýlar men sheberlik sabaqtary uıymdastyryldy.
«Open Turkistan» týrıstik aqparattyq ortalyǵy is-shara barysynda Túrkistannyń alǵashqy gastrokartasyn tanystyrdy. Kartada qaladaǵy tamaqtaný oryndary týraly týrısterge arnalǵan aqparat bar.
«Mysaly, gastronomııalyq kartadan naǵyz túrkistandyq samsany, ońtústik kebabty, qazaq taǵamdarynyń kóne retsepteri boıynsha taǵamdardy nemese jergilikti fast-fýdty qaıdan jeýge bolatynyn taba alasyz. Gastrokarta týrısterge arnalǵan nusqaýlyq qana emes, sonymen qatar meıramhanalar men kafelerge barý úshin jeńildik kýpondarynyń jınaǵy. Barlyq kýpondar jyl sońyna deıin jaramdy», - delingen habarlamada.
