Túrkistan qalasynyń erekshe mártebesi týraly Zań jobasy daıyndalyp jatyr
Túrkistan oblysynyń ákimi Darhan Satybaldy bıylǵa josparlanǵan halyqpen kezdesýin oblys ortalyǵynan bastady. El aldynda esep berý jıynynda aımaq basshysy aldymen ótken jyly atqarylǵan jumystardy baıandap, halyqpen kezdesýlerdiń nátıjesimen bólisti. Sondaı-aq ótken jyldan beri óńirde júzege asyp jatqan jumystarǵa keńinen toqtalyp, aldaǵy josparlaryn aıtty.
«Memleket basshysy Qasym-Jomart Toqaev Túrkistan óńirine jasaǵan jumys saparynda Túrkistan qalasyna erekshe mártebe berýdi tapsyrǵan edi. Bul baǵytta tıisti jumystar bastalyp ketti. Búginde «Túrkistan qalasynyń erekshe mártebesi týraly» Zań jobasy daıyndalyp jatyr. Osy zań qabyldanǵan soń, qala ákimdigi men máslıhatyna qosymsha quzyretter beriletin bolady. Bul turǵyndardyń kúrdeli máselelerin tez arada sheshýge múmkindik beredi. Atap aıtqanda, turǵyn úı-kommýnaldyq sharýashylyq, kólik jáne avtomobıl joldary, sáýlet, qala qurylysy, saýda jáne qyzmet kórsetý suraqtary qala deńgeıinde derbes sheshiletin bolady», – dedi oblys ákimi Darhan Satybaldy.
«Aqjaıyq» mýzykalyq mektebinde ótken ákimniń halyqqa esep berý kezdesýine 500-den astam túrkistandyq keldi. Onyń 100-ge jýyǵy – jastar. Suraq-jaýap formatynda uıymdastyrylǵan jıynda aımaq basshysy Túrkistannyń elimizdiń rýhanı jáne tarıhı ortalyǵyna aınalý jolynda júzege asatyn mańyzdy sharalarǵa toqtalyp, damýdyń túrli salalary boıynsha kórsetkishterdi málim etti.
