Túrkistan qalasynyń bas jospary tanystyryldy
TÚRKІSTAN. QazAqparat – Túrkistan qalasynyń bas josparyna sáıkes shahar aýmaǵy 22 370 gektardy quraıdy. Qala ákimdiginde shahardyń bas josparynyń jobasy tanystyryldy, dep habarlaıdy QazAqparat tilshisi.
Sharaǵa jobany ázirlegen «Astana bas jospary» ǵylymı zertteý jobalaý ınstıtýty» JShS qyzmetkerleri men qoǵamdyq uıym ókilderi jáne qala turǵyndary qatysty. Sala mamandarynyń sózinshe, endi oblys ortalyǵynyń aýmaǵy keńeıip, halyq sany artpaq. Máselen, qazir 164 900 halyq turatyn bolsa, onyń sany 2025 jylǵa qaraı bas jospardyń birinshi kezeńinde 250 myńǵa deıin ósedi dep kútilýde. Al, 2035 jyly eseptik merzimde 350 000 adamǵa jetkizý kózdelip otyr. Qalada turǵyn úılerdiń sany artyp, 2035 jylǵa qaraı bir adamǵa shaqqanda 28 sharshy metrge deıin ósedi dep kútilýde
«Bul jaýapkershiligi joǵary joba úsh kezeńge bólip qarastyrylýda. Buǵan 10 qosalqy merdiger men 200-den asa maman, ıaǵnı sáýletshiler, qala qurylysshylary, ekonomıster, tarıhshylar, ekologtar syndy mamandar qatysty. Bas josparda qalanyń tarıhı-mádenı murasyn saqtaý jáne qalpyna keltirý talaptary qatań saqtalǵan. Sondaı-aq, Túrkistanda qala qurylysyn damytýdyń negizgi baǵyttary aıqyndalyp, ıÝNESKO Dúnıejúzilik mura komıtetiniń usynystary oryndaldy», – dedi «Astana bas jospary ǴZJI» JShS bas jospardyń arnaıy sheberhana basshysy Álibek Ábdraıymov.
Sonymen qatar, rýhanı shaharda shyǵystyq úlgide jańa ákimshilik-iskerlik ortalyq boı kóterip, qalanyń ajaryn asha túspek. Jobalaý boıynsha sý, jylý, gaz, elektrmen jabdyqtaý da uıymdastyrylyp, qaldyq sýlar aǵatyn káriz júıeleri de nazardan tys qalmaǵan.
