Túrkistan qalasynyń bas jospary talqylandy
TÚRKІSTAN. QazAqparat - Búgin Túrkistan oblysynyń ákimi Janseıit Túımebaevtyń tóraǵalyǵymen Túrkistan qalasynyń bas jospary talqylandy, dep habarlaıdy óńir basshysynyń baspasóz qyzmeti.
Jıynda sóz alǵan aımaq basshysynyń birinshi orynbasary Qaırat Núkenov jobalardyń oryndalý barysyn baıandady.
«Qazirgi ýaqytta oblys ortalyǵynda boı kóteretin jańa áleýmettik jáne mádenı nysandarynyń kontsept-eskızderin daıyndaýǵa baǵyttalǵan «TURKISTAN ARCHITECT AWARDS» halyqaralyq sáýlet konkýrsyna usynylǵan jumystar iriktelýde. Elbasy tapsyrmasy boıynsha salynatyn nysandarǵa jaýapty ár oblys ákimdikteri men iri kompanııalardyń ókilderimen birlese otyryp jol kartasy ázirlendi. Nysandar ornalasatyn aýmaqtarda jer bólý jumystary júrgizilýde», - dedi Qaırat Temirshotuly.
Óz kezeginde oblys ákimi jumystardyń sapaly ári ýaqtyly oryndalý kerektigin atap ótti.
«Ár jobanyń oryndalý barysy turaqty túrde baıandalyp tursyn. Óz tarapymyzdan atqarylatyn jumystar tolyǵymen oryndalsyn. Qurylystyń sapasyna jáne merzimine asa mán berilýi kerek. Elbasynyń Túrkistandy damytý boıynsha berilgen tapsyrmasyn tııanaqty oryndaýǵa tıispiz», - dedi Janseıit Qanseıituly.
Kezdesý sońynda qala ákimine, oblystyq qurylys basqarmasy men sáýlet jáne qala qurylysy basqarmasynyń basshylaryna, jaýapty tulǵalarǵa birqatar tapsyrmalar berildi.
