Túrkistan qalasynyń bas jospary eki kezeńge bólinedi
ASTANA. QazAqparat - 27 maýsymda QR Premer-Mınıstrdiń birinshi orynbasary Asqar Mamın tóraǵalyǵymen Túrkistandy damytý jaıyndaǵy Úkimettik komıssııanyń alǵashqy otyrysy ótkizildi. Bul týraly QR Premer- Mınıstriniń baspasóz qyzmetine silteme jasap QazAqparat habarlaıdy.
Úkimettik komıssııa tóraǵasy 2018 jylǵy 19 maýsymda Memleket basshysynyń Túrkistan oblysyn qurý týraly Jarlyǵy -tarıhı mańyzdy qujaty jaryq kórgendigin atap ótti.
«Qasıetti Túrkistan qalasy búkil túrik áleminiń mádenı-rýhanı astanasy, qutty mekeni. Memleket basshysynyń strategııalyq sheshiminiń arqasynda bul aımaqtyń órkendeýine qarqyndy serpin beriledi. Túrkistan qalasynyń oblys ortalyǵy retinde órkendep damýy úshin barlyq áleýeti bar. Aldymen qalanyń Bas josparyn daıyndaýymyz qajet. Túrkistan qalasynyń qarqyndy ınfraqurylymdyq damýyn qamtamasyz etý kerek»,-dep atap ótti A. Mamın.
Komıssııanyń alǵashqy otyrysynda oblystyq memlekettik organdardy Shymkent qalasynan Túrkistan qalasyna kóshirý máselesi, qalanyń ınjenerlik-kommýnıkatsııalyq ınfraqurylymynyń qazirgi jaǵdaıy, Túrkistan qalasy bas josparynyń tujyrymdamasyn ázirleý jáne ótkizý, oblys ekonomıkasynyń odan ári damý máselesi qaraldy.
Oblys ákimi J. Túımebaevtyń habarlaýynsha, Memleket basshysynyń oblys ortalyǵyn Túrkistan qalasyna kóshirý jónindegi Jarlyǵyn oryndaý maqsatynda arnaıy shtab quryldy. Ákimshilik basqarý oryndarynyń kóship ornalasý jospary jasaldy. Óńirdi áleýmettik-ekonomıkalyq damytýdyń negizgi baǵyttary belgilendi. Negizgi energetıkalyq ınfraqurylymdyq nysandar, sýmen qamtý júıeleri, kólik - logıstıkalyq jelisi, qyzmet kórsetý men týrıstik ortalyqtardy odan ári damytý jaıy qaraldy.
Túrkistan qalasynyń damýy jóninde qala ákimi Á. Óserbaev baıandady. Qalanyń Bas jospary men óńirdiń ekonomıkasyn damytý týraly Investıtsııa jáne damý vıtse-mınıstri Q. Óskenbaev, Ulttyq ekonomıka vıtse-mınıstri A. Jumaǵulov baıandady.
QR Premer-Mınıstriniń birinshi orynbasary otyrys qorytyndysy boıynsha memlekettik organdar men oblys ákimshiligine Shymkentten Túrkistanǵa kóshý máselesine qatysty birqatar naqty tapsyrmalar berdi.
Tıisti mınıstrlikter men mekemelerge Túrkistan qalasynyń ınjenerlik jáne áleýmettik ınfraqurylymyn damytý maqsatyndaǵy salalyq bas nobaıyn jasaýdy bastaý týraly tapsyrma berildi.
2018 jylǵy 12 shildede Bas jospardyń tujyrymdamasyn daıyndaýǵa konkýrs jarııalanady. Konkýrs eki aıdyń ishinde ótetin bolady. Halyqaralyq sarapshylar toby qurylady. Konkýrsqa qatysýǵa otandyq jáne halyqaralyq sáýletshiler shaqyrylady.
Bas Jospar eki kezeńge bólinedi. Birinshi kezeń - 2035 jylǵa deıin, ekinshi kezeń- 2050 jylǵa deıin. Bıylǵy qyrkúıekke deıin Bas jospardyń tujyrymdamasy ázirlenedi. Úzdik tujyrymdama anyqtalǵan soń, ony júzege asyrýǵa baıqaý jarııalanady.
A.Mamın Túrkistan oblysyna sapary barysynda Túrkistannyń birqatar ınfraqurylymdyq nysandaryn aralady.
Atap óterligi, Memleket basshysynyń Túrkistan oblysyn qurý jónindegi tapsyrmasyna baılanysty Bas jospardy jasaý jónindegi Úkimettik komıssııa quryldy. QR Premer-mınıstriniń birinshi orynbasary A. Mamınniń basqarýymen Túrkistan qalasyn túrki dúnıesiniń mádenı jáne rýhanı ortalyǵy retinde damytýdyń Úkimettik komıssııasy qurylǵan bolatyn.
