Túrkistan qalasynyń aýmaǵy ulǵaıtyldy

TÚRKІSTAN. QazAqparat – Túrkistan oblysy ákimi Ómirzaq Shókeev jańa nysandardy aralap, ǵımarattardyń aınalasyn abattandyrý men kógaldandyrý jumystarymen tanysty. Bul týraly QazAqparat ákimdikke silteme jasap habarlaıdy.

Shahardyń klımatyn eskere otyryp, qala syrtynda kógaldandyrýdyń úzdiksiz júıesin jáne Syrdarııa ózeniniń tabıǵı ósimdikter dúnıesimen qosylýdy qamtamasyz etetin jasyl beldeýdi qalyptastyrylǵan. Kógaldandyrýdyń jalpy aýdany 13 myń gektardy quraıdy. Jasyl alqap Túrkistannyń tabıǵı tynysyna aınalyp, nátıjesinde, aýa tazaryp, qala shań men jeldi daýyldan qorǵalady dep kútilýde. Túrkistan qalasynda búginde 400 gektar jerge jaıǵasqan 11 saıabaq, 5 jasyl aımaq, 25 alleıa men gúlzar bar. Ár saıabaq kreatıvti ári erekshe, qaıtalanbas úlgide salynǵan.

Máselen, jalpy aýmaǵy 38 gektardy quraıtyn «Tuńǵysh Prezıdent saıabaǵynda» syıymdylyǵy 100 tekshe metr bolatyn jasandy aral paıda boldy. Ol úshin sý uńǵymasy men rezervýar salynǵan. 10 myńǵa jýyq aǵash otyrǵyzylyp, joldar tóseldi.

Sattarhanov kóshesiniń boıyndaǵy «Jelilik saıabaqtyń» da jer kólemi 20 gektardan asady. Saıabaqta 5 myńǵa jýyq aǵash, 25 myńǵa jýyq jasyl buta egilip, jasandy toǵan ornatylǵan.

Túrkistan qalasynyń aýmaǵy 19 627 gektardan 22 370 gektarǵa ulǵaıtyldy.

Bas jospar boıynsha qalanyń damý satylary belgilengen. Alǵashqysy 2020 jyly bastalyp, 2025 jyly aıaqtalady dep josparlanǵan. Ekinshi kezeńi – 2035 jyly, úshinshi kezeńi - 2050 jyly aıaqtalady. 2025 jylǵa deıin qala turǵyndarynyń sanyn 250 myńǵa deıin, 2035 jylǵa qaraı - 350 myń adamǵa deıin jetedi. 2050 jyly - 500 myń bolady.

200 myńǵa jýyq turǵyny bar Túrkistannyń damý múmkindikteri aýqymdy. Qala aýmaǵynda óndiristik, kommýnaldyq jáne ınfraqurylym qyzmetin qamtamasyz etetin nysandardy ornalastyratyn aımaqtar belgilenip, bekitilgen. Bul óz kezeginde Túrkistannyń ınvestorlar úshin tartymdylyǵyn arttyra túsedi. Týrızm jáne ónerkásip – Túrkistan damýynyń negizgi eki baǵyty. Qalanyń bir jylda mıllıonnan astam týrıstti qabyldaýǵa múmkindigi bar. Keleshekte bul kórsetkishti 5 mıllıonǵa jetkizý josparlanyp otyr.

Qazirgi tańda qalada 11 kıeli nysan men murajaı, 6 rýhanı-mádenı nysan, 4 týroperator kelýshilerge óz qyzmetin usynýda.