Túrkistan qalasynyń áýejaıynan alǵashqy halyqaralyq reıs oryndaldy

NUR-SULTAN. QazAqparat - 2021 jylǵy 21 naýryzda Naýryz meıramy qarsańynda Elbasynyń jáne QR Prezıdentiniń tapsyrmasymen qurylǵan alǵashqy otandyq loýkost áýe tasymaldaýshysy Fly Arystan áýe kompanııasy Qazaqstannyń rýhanı astanasy Túrkistan qalasynan Ystanbulǵa alǵashqy halyqaralyq turaqty reısti oryndady.

Bul týraly QazAqparat QR Indýstrııa jáne ınfraqurylymdyq damý mınıstrliginiń Telegram kanalyna silteme jasap habarlaıdy.

Túrkistan jáne Ystanbul qalalary arasynda turaqty áýe qatynasy aptasyna 2 reıspen, juma jáne jeksenbi kúnderi A-320 áýe kemesimen oryndalady. Keıinnen reıster sany aptasyna 7-ge deıin (kún saıyn) kóbeıedi.

Bılet quny 39 999 teńgeden bastalady.

Túrkistan – Ystanbul alǵashqy reısine 176 bılet satyldy (98%).

Alǵashqy turaqty reıs iske qosylǵan sátten bastap (2020 jylǵy 1 jeltoqsan) Túrkistan qalasy áýejaıynan 80-nen astam reıs oryndalyp, 23 myńǵa jýyq jolaýshy tasymaldandy. Reısterdiń ortasha kommertsııalyq júktemesi 85% qurady.

Búgingi tańda Túrkistan qalasy áýejaıynan Nur-Sultan, Almaty, Atyraý qalalaryna ishki reıster oryndalýda. Bıyl jyldyń ekinshi toqsanynan bastap túrki áleminiń rýhanı ortalyǵy retinde Túrkistandy 10 oblys ortalyǵymen (Aqtaý, Aqtóbe, Atyraý, Qaraǵandy, Kókshetaý, Qostanaı, Pavlodar, Petropavl, Taldyqorǵan, Óskemen) aptasyna 53 reıspen baılanystyrý josparlanyp otyr.

Túrkistan qalasynyń áýejaıy shet elderdiń áýe kompanııalarynyń ushýy úshin «ashyq aspan» rejımine engizilgen. Bul ushý geografııasyn keńeıtý úshin áýejaıdy tartymdy etedi jáne sheteldik týrısterdi kóptep tartýǵa yqpal etedi.

Túrkistannan Novosıbırskige (RF), Bishkekke (Qyrǵyzstan), Tashkentke (Ózbekstan) jáne t.b. jańa reısterdi iske qosý josparda bar. Reıster sanıtarlyq – epıdemıologııalyq talaptardy qatań saqtaı otyryp jáne áýe kompanııasynyń saıtynda jarııalanǵan kestege sáıkes oryndalady.