Túrkistan qalasynyń ákimi Rashıd Aıýpov halyqqa jańa formatta esep berdi
TÚRKІSTAN. QazAqparat – Túrkistan qalasynyń ákimi Rashıd Aıýpov shahardyń byltyrǵy áleýmettik-ekonomıkalyq damý qorytyndysy men bıylǵa josparlanǵan mindetter týraly esebin TedX búkilálemdik tájirıbe negizindegi jańa formatta ótkizdi. Shahar basshysynyń halyqqa esep berý kezdesýine qatysqan oblys ákimi Ómirzaq Shókeev onyń jańashyldyǵyna oń baǵasyn berdi, dep habarlaıdy QazAqparat tilshisi.
«Biz – kúlli túrki áleminiń mádenı-rýhanı ordasyna aınalǵan qasıetti mekenimiz – Túrkistan shaharyn tarıhı qundylyqtaryna qııanat jasamaı, qaz-qalpy saqtaı otyryp kórkeıtýimiz qajet. ıÝNESKO-nyń kóne muralar tizimine engeli otyrǵan qasıetti muramyzdyń árbir alańy bizdiń baılyǵymyz. Osyny jadymyzda saqtap, birige kórkeıtýimiz qajet», – dedi aımaq basshysy Ómirzaq Shókeev.
171 myń turǵyny bar qaıta jańǵyrǵan Túrkistan shahary oblys ortalyǵyna aınalǵaly úlken jetistikterge qol jetkizildi. Oblys ortalyǵynda 26 ákimshilik-iskerlik jáne mádenı ortalyq nysandary boı kóterdi. Halyqty baspanamen turaqty qamtý maqsatynda bıyl qosymsha 50-ge jýyq turǵyn úıdiń qurylysy júrgizilip jatyr. Aldaǵy 2-3 jylda joldardy asfalttaý jáne jaryqtandyrý máselesin tolyǵymen qamtý josparlanǵan. Demalys aımaqtaryn kóbeıtý maqsatynda ortalyq kóshe boılarynan 10 shaqty alleıalar salynǵan jáne saıabaqtar kúrdeli jóndeýden ótkizilgen. Qalany kógaldandyrý jumystary bıyl da jalǵasyn tappaq. Qala mańynan jalpy aýmaǵy 7,5 myń gektardy quraıtyn «Jasyl beldeý» qurý jobasy tyńǵylyqty iske asyp keledi. Uzyndyǵy 145 shaqyrymdy quraıtyn beton kanal salý jumystary júrgizilýde. Osylaısha qalany kógaldandyra otyryp, klımat jaǵdaıyn jaqsartý kózdelgen. Atap ótý kerek, shahar basshysy esep berýinde onlaın baılanys arqyly jergilikti telearnanyń tikeleı efıri men áleýmettik jeliler arqyly halyqpen tikeleı baılanysta bolyp, saýaldaryna da jaýap berdi.
