Túrkistan qalasynyń ákimi kópqabatty úılerdiń qysqa daıyndyǵymen tanysty
TÚRKІSTAN. QazAqparat – Túrkistan qalasynyń ákimi áleýmettik jelige kelip túsken ótinishterge zer salyp, kópqabatty úılerdiń qysqa daıyndyǵymen tanysyp shyqty. Rashıd Aıýpov bastaǵan ákimdik qyzmetkerleri 9 kópqabatty úıdi aralap, jertólelerdegi sarqyndy sý men qubyrlardy jáne berilip jatqan jylýdyń deńgeıin qadaǵalady, dep habarlaıdy QazAqparat tilshisi.
Oblys ortalyǵyndaǵy 1-inshi jáne 2-inshi móltekaýdandaǵy turǵyn úılerde qysqy maýsymǵa daıyndyq pen jylý qazandyqtarynyń talapqa saı jumys isteýi tekserildi. Shahar basshysy úılerdiń qazirgi jaǵdaıyn muqııat kórip shyqty. Tekseris barysynda jylýdyń óz deńgeıinde berilip jatqany belgili boldy. Alaıda, jazǵy ýaqytta qysqy maýsymǵa baılanysty jylý júıesi talapqa saı júrgizilmegeni anyqtaldy. Bul jumys jazda aldyn ala jasalýy tıis bolatyn. Osy maqsatta, qalada atalǵan saýalǵa jaýap beretin servıstik mekeme bolmaǵandyqtan OQO úılerdi basqarý JShS servıstik kompanııasy jumys isteýde. Kompanııa 1-2-móltek aýdandaǵy jalpy sany 75 kópqabatty úıdiń 24-men kelisim-shartqa turǵan. Atalǵan másele boıynsha mekeme de jumysyn shıratpaq. Baqylaý barysynda syrtqy aýa temperatýrasyna baılanysty jylý berilip jatqandyǵynan halyq habardar boldy. Al, keıbir úılerde ózindik ishki jóndeý jumysyna baılanysty olqylyqtar oryn alǵan. Mamandar turǵyndarǵa túsindirý jumystaryn júrgizip, máseleniń basyn ashýǵa tyrysty. Al, jertólelerdegi qoqystardy tazartý úshin kópqabatty úılerde senbilikter ótkiziletin boldy.
Aıta keteıik, shahardaǵy jalpy sany 87 kópqabatty úıge 25 qazannan bastap jylý berilgen bolatyn. Onyń 12-si Otyrar móltek aýdanynda ornalasqan. Al 1-inshi jáne 2-inshi móltekaýdanda 75 kópqabatty úı bar.
