Túrkistan qalasynyń ákimi qarajatty tıimdi jumsaý kerektigin eskertti
TÚRKІSTAN. QazAqparat – Túrkistanda qala ákimi apparatynyń kezekti májilisi ótti. Shahar basshysy Rashıd Aıýpovtyń qatysýymen ótken basqosýda tótenshe jaǵdaılardyń aldyn alý men qalanyń sanıtarlyq tazalyǵyn qamtamasyz etý máseleleri talqylandy, dep habarlaıdy QazAqparat tilshisi.
Jıynda qalalyq tótenshe jaǵdaılar basqarmasynyń 9 aıda atqarǵan jumys barysy baıandaldy. Basqarma basshysynyń mindetin atqarýshy Asqar Seısenovtiń sózinshe, jyl basynan beri tótenshe jaǵdaılar qyzmetiniń dıspetcherlik pýnktine 257 habarlama túsken. Tótenshe jaǵdaılardyń aldyn alý jumystary óz deńgeıinde atqarylyp, ýly gazdan zardap shegý faktisi boıynsha birde-bir derek tirkelmegen.
«Qyzmetkerlerimiz tarapynan 187 nysanǵa tekseris júrgizildi. Onyń ishindegi 137-si erekshe tártip boıynsha, 50 nysan josparsyz tekserildi. Osy ýaqytqa deıin órt qaýipsizdik talaptaryn buzǵany úshin ákimshilik jaýapkershilikke tartylǵan 79 turǵynnyń 41-i eskertý alsa, 38 azamatqa – 997 375 teńgeni quraıtyn aıyppul salyndy. Josparǵa sáıkes tekserý jumystary jalǵasýda. Túrkistandyqtardyń arasynda jylytý maýsymynda oqys oqıǵa oryn almas úshin túsindirme jumystary júrgizilýde»,- dedi Asqar Seısenov.
Al, «Túrkistan Jaryq-Tazalyq» JShS dırektory Aıan Toǵyzbaev qalanyń sanıtarlyq tazalyǵyn qamtamasyz etý maqsatynda saýda jáne turǵyn úılermen kelisim-shart jasaý jáne qarjysynyń túsimi týraly málimdep ótti. Alaıda onyń baıandamasyna qanaǵattanbaǵan qala basshysy Rashıd Aıýpov kelesi aptada osy ózekti máseleniń kún tártibine engizilýin tapsyrdy. «Halyqty nátıjeli jumyspen qamtý ortalyǵy» MKK-niń jumysy synǵa alynyp, qala ákiminiń orynbasary Tájibek Musaev mekeme mamandaryn qaıta jasaqtaýdy usyndy.
Jıynda sóz alǵan ekonomıka jáne qarjy bóliminiń basshysy Záýre Bımbetova jergilikti bıýdjettiń toǵyz aılyq qorytyndysy boıynsha ıgerilýi 99,7 paıyzdy quraǵanyn jetkizdi. Bul rette qala ákimi Záýre Bımbetovaǵa derbes bólimder qarjysynyń ıgerilmeýi boıynsha talap etý kerektigin aıtyp, oblys ortalyǵyna aıryqsha mán berilip otyrǵandyǵyn nazardan tys qaldyrmady. Sondyqtan, respýblıkadan, oblystan bólingen qarjyny turǵyndarǵa jaılylyq syılap, shahardy kórkeıtý jolynda tıimdi paıdalaný kajettiligin atap ótti.
