Túrkistan qalasynyń ákimi buqaralyq aqparat quraldary ókilderimen kezdesti
TÚRKІSTAN. QazAqparat – Túrkistan qalasynyń ákimi Rashıd Aıýpov buqaralyq aqparat quraldary ókilderi men áleýmettik jeli belsendilerimen kezdesip, atqarylyp jatqan jumystar barysyn baıandady.
Qalanyń bas josparymen tanystyryp, birqatar jobalar júzege asyrylatynyn jetkizdi, dep habarlaıdy QazAqparat tilshisi.
Qala basshysynyń sózinshe, búginde oblys ortalyǵynda halyq sany 170 myńǵa jetken. Aldaǵy bes jyldyqta bul kórsetkish eki esege deıin ulǵaıyp, halyq sany 350 myńǵa jetedi dep josparlanyp otyr. Al, kıeli shaharda týrısterdi tańqaldyrý maqsatynda tyń jobalardy qolǵa alý qarastyrylýda eken. Máselen, Qoja Ahmet ıAsaýı kesenesi mańynda erekshe joba jasalmaq.
«2050 jyly Túrkistan qalasy álemdegi 3 qalaǵa uqsaýy kerek dedik. Olar Stambýl, Ierýsalım, Rım qalalary. Osy úsh qalanyń bireýine teńestirýimiz kerek. Ol úshin qansha ınfraqurylym kerek, qansha jumys atqarylýy qajet. Bilimimizdi kóterip, kóp daıyndyqtar júrgizýimiz qajet. Qansha demalatyn orynda paıda bolýy kerek. Amerıkanyń tanymal ári sáýlet jaǵynan óte myqty kompanııasymen kelisimge kelip, Qoja Ahmet ıAsaýı kesenesi mańynan úlken jobalar jasap jatyr. Sizderge shet jaǵasyn aıtaıyn, aldaǵy ýaqytta kesene mańynda úlken– úlken qaıyqtarmen júzip júretin bolamyz sol jerde», – dedi Rashıd Aıýpov.
Shahar basshysy sonymen qatar BAQ ókilderi men áleýmettik jeli belsendilerin tolǵandyrǵan suraqtarǵa jaýap berip, aldaǵy josparlarymen bólisti.
