Túrkistan qalasynyń 11 jasar turǵyny ákimniń nazaryn aýdardy
TÚRKІSTAN. QazAqparat – Túrkistan qalasynyń 11 jasar turǵyny Nurbolat Tasbolat qala ákimi Rashıd Aıýpovpen kezdesti. Sattar Erýbaev atyndaǵy №7 mektep-ınternattyń oqýshysy kóshelerdiń birindegi shashylyp jatqan qoqysty jınap, qalaǵa degen súıispenshiligin bildirgen bolatyn, dep habarlaıdy QazAqparat tilshisi.
Balanyń qoqys jınap júrgen sýreti áleýmettik jelilerde jarııalanǵan soń qala ákimi onymen tanysqysy keletinin aıtty. Túrkistan qalasynyń ákimi Rashıd Aıýpov oqýshyny arnaıy qabyldap, jas patrıotqa alǵys hat jáne mektepke qajet quraldar salynǵan sómke tartý etti.
Qala basshymen kezdesken oqýshy týraly ustazdary da jaqsy pikirde.
«S.Erýbaev atyndaǵy №7 mektep-ınternatynyń 6-synyp oqýshysy Tasbolat Nurbolat – oqý ekpindisi, kópbalaly otbasynan shyqqan ári tárbıeli jasóspirim. Qoǵamdyq jumystarǵa da belsene qatysady. Ata-anasy - eńbekqor jandar. Minezi ashyq, dostary jáne synyptastarymen jaqsy aralasady. Mektepte «Sóz marjany» úıirmesine qatysady», – deıdi mektep dırektorynyń tárbıe isi jónindegi orynbasary Qalbıbi Arqabaeva.
Jalpy, Túrkistan qalasynda búgingi kúni abattandyrý jumystary úlken qarqynmen júrip jatyr. Qala tazalyǵy da basty nazarda. Ár apta saıyn senbilikter uıymdastyrylyp, kósheler men joldar qoqystardan tazarýda.
Bul iske óńirdiń aýdan-qalalary da óz úlesin qosyp jatyr. Atap aıtar bolsaq, Birlik eldi mekenine jaýapty Jetisaı aýdany, oblystyq qoǵamdyq damý basqarmasy, Túrkistan qalalyq ishki saıasat bólimi ózine tıesili 15 sektor boıynsha senbilik jumystaryn apta saıyn turaqty túrde júrgizip keledi.
