Túrkistan qalasyndaǵy dárihanalar baǵany negizsiz kótergen

TÚRKІSTAN. QazAqparat – Túrkistan oblysynda «Túrkistan –adaldyq alańy» jobalyq keńsesiniń uıymdastyrýymen birqatar dárihanalarǵa dári-dármek baǵasynyń turaqtylyǵyn qamtamasyz etý maqsatynda monıtorıng júrgizildi. Shara barysynda dárihanalarda kassa apparatynyń bolmaýy jáne dári-dármek baǵasynyń negizsiz kóterilýi syndy kemshilikter anyqtalǵan, dep habarlaıdy QazAqparat tilshisi.

Arnaıy jumysshy toptyń quramynda QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamentiniń ókili, aǵa ofıtser Aqtóre Talǵatuly men «Túrkistan – adaldyq alańy» jobalyq keńsesiniń menedjerleri, oblystyq taýarlar men kórsetiletin qyzmetterdiń sapasy, qaýipsizdigin baqylaý departamentiniń jáne QR UEM «Básekelestikti qorǵaý jáne damytý» Túrkistan oblysy boıynsha departamentiniń qyzmetkerleri jáne oblystyq «Atameken» QR Ulttyq kásipkerler palatasynyń ókilderi qatysty.

Top músheleri oblys ortalyǵyndaǵy dárihanalarda dári-dármekterdiń baǵasyna zerdeleý jumysyn júrgizip, baǵany negizsiz kótergenderge eskertý jasady.

Budan bylaı oblys turǵyndaryna dárihanalardaǵy dári-dármek qunynyń negizsiz kóterilgendigin baıqaǵan jaǵdaıda 109, 102 jáne agenttiktiń 1424 Call ortalyǵyna nemese [phone] nómirine Whatsapp qosymshasy arqyly joldaýǵa bolatyny habarlandy.

Onda jergilikti halyq dárihana ataýy men ornalasqan jerin jáne dybys pen beınematerıaldar jibere alady. Aldaǵy ýaqytta «Túrkistan – adaldyq alańy» jobalyq keńsesi dári-dármek qunyna turaqty monıtorıng júrgizýdi júıeli túrde jalǵastyrady.