Túrkistan qalasyndaǵy áýejaı áli resmı ashylǵan joq – Sáken Qalqamanov
TÚRKІSTAN. QazAqparat – Túrkistan qalasyndaǵy áýejaıda tek tehnıkalyq ashylý bolǵan. Resmı ashylý saltanaty kelesi jyldyń basyna josparlanyp otyr. Bul týraly oblys ákiminiń orynbasary áleýmettik jelidegi tikeleı efır kezinde málimdedi, dep habarlaıdy QazAqparat tilshisi.
Sáken Qalqamanovtyń sózinshe, jańadan salynyp jatqan áýejaıdyń basty termınaly men ushyp-qoný jolaǵy daıyn.
«Qazir áýejaıdaǵy qural-jabdyqtar men ǵarysh navıgatsııasyn ornatý men ózge de qurylys jumystary júrip jatyr. Áýejaı tolyq ashyldy nemese erteń sol jerden ushaq usha bastaıdy degen málimdeme bolǵan joq»,- dedi oblys ákiminiń orynbasary.
Aıta keteıik, áleýmettik jelilerde keıbir azamattar Túrkistan áýejaıynyń resmı ashylýy bolǵanymen iske qosylmaǵan degen syn aıtqan bolatyn.
Tikeleı efır barysynda Sáken Qalqamanov sondaı-aq, Túrkistan qalasyn gazben qamtý máselesine de toqtalyp ketti.
«Kógildir otyn Túrkistan qalasyna kelgen. Búkil qalanyń ishine gaz qubyrlary tartylǵan. Sol qubyrlarǵa turǵyndar endi qosylýy kerek. Ol úshin «Ońtústik gaz aımaq» kompanııasyna tıisti tólemer tólese bolǵany. Gazǵa qosylý 89 myń teńgeden bastalady. Qazir qala ákimdigi men oblystyq turǵyn úı kommýnaldyq sharýashylyq basqarmasynyń mamandary turǵyndar arasynda túsindirme jumystaryn júrgizýde», - dedi oblys ákiminiń orynbasary.
Foto:matritca.kz