Túrkistan qalasynda jańadan salynǵan 17 kópqabatty úı satylymǵa qoıyldy
Oblys ortalyǵyndaǵy kópqabatty úılerdiń qurylysy men aýmaǵyn abattandyrý jumystary týraly másele kezekti aptalyq májiliste talqylandy, dep habarlaıdy QazAqparat tilshisi.
Túrkistan qalasynyń ákimi Nurbol Turashbekovtyń baıandaýynsha, jeltoqsan aıynyń sońyna deıin 610 páter Túrkistan qalasynyń turǵyn úıge muqtaj otbasylar tizimine tirkelgen kópbalaly jáne áleýmettik álsiz toptaǵy otbasylarǵa kezek retimen baspana berý josparlanýda.
Qalanyń ákimshilik-iskerlik ortalyǵynda bıýdjet esebinen 7, 9 jáne 12 qabatty 67 turǵyn úıdiń qurylys jumystary júrip jatyr. Sonymen birge jańa úılerdiń aýlalary abattandyrylyp, balalar alańqaılary salynýda. Jıynda «Aýyl – El besigi» jobasynyń iske asyrylý barysy da baıandaldy. Aýyl halqynyń turmysyn kóterý úshin qolǵa alynǵan «Aýyl – El besigi» jobasy aıasynda Túrkistan oblysynyń 86 aýyldyq eldimekeninde 316 joba iske asyrylýda. Ol úshin QR Ulttyq qorynan, respýblıkalyq jáne oblystyq bıýdjetterden jalpy 16,3 mlrd teńge bólingen. Jobalardy iske asyrý barysynda 2 myńnan astam jumys orny quryldy.
Oblystyq strategııa jáne ekonomıkalyq damý basqarmasynyń basshysy Qanat Qaıypbektiń aıtýynsha, bıyl 291 nysandy paıdalanýǵa tapsyrý josparlanyp otyr. Sondaı-aq, 25 nysan keler jylǵa ótpeli. Búgingi tańda 230 nysannyń jumystary aıaqtalyp, paıdalanýǵa berilgen. Jyl basynan beri 8 mekteptiń qosymsha qurylysy júrgizilip, 10 mektep kúrdeli jóndeýden ótip jatyr. Bir dárigerlik ambýlatorııa salynyp, 4 densaýlyq saqtaý nysanyna kúrdeli jóndeý júrgizgen. Eki sport nysany men 2 mádenıet nysany, 15 tabıǵı gazben qamtamasyz etý nysanynyń qurylysy júrgizilip jatyr. Sonymen birge 13 elektr qýatymen jabdyqtaý nysandary salynyp, 261 ishki kóshe ortasha jóndeýden ótken.
