Túrkistan qalasynda «Parasat ortalyǵy» ashyldy
Biregeı joba Túrkistan oblysy boıynsha Sybaılas jemqorlyqqa qarsy qyzmet departamenti jáne Túrkistan qalasynyń ákimdiginiń bastamasymen Memleket basshysynyń «Halyq únine qulaq asatyn memleket» tujyrymdamasy men «Adaldyq alańy» ulttyq jobasy aıasynda júzege asty.
Ashylý rásimine oblys ákimi Ómirzaq Shókeev, Túrkistan oblysy boıynsha Sybaılas jemqorlyqqa qarsy qyzmet departamentiniń basshysy Hakım Kóshqalıev, belsendi qoǵam músheleri jáne BAQ ókilderi qatysty.
Ortalyqtyń basty maqsaty - halyqtyń ózekti máselelerin sheshý boıynsha shuǵyl áreket etý jáne azamattardyń quqyǵyn júzege asyrýda memlekettik organdardyń ózara birlese árekettesýin qamtamasyz etý.
Qazirgi ýaqytta «Adaldyq alańy» jobasy aıasynda oblysta memlekettik qyzmetterdi alý barysynda qolaıly jaǵdaıdy qamtamasyz etetin, sonymen qatar ákimshilik kedergiler men bıýrakratııalyq sozbalańdy boldyrmaýǵa baǵyttalǵan memlekettik organdardyń «servıstik» úlgige (servıstik ákimdikter) kóshý protsesi qarqyndy júrgizilýde.
«Búgin biz taǵy bir eleýli oqıǵanyń kýágeri boldyq. Túrkistanda kóptegen ǵımarattar ashylyp jatyr. Biraq bul ǵımarattyń orny bólek. Adaldyq ortalyǵyna halyq kelip óz máselelerin aıtyp, tıisti quqyqtyq keńester alady. Bul - Elbasymyzdyń talaby, Prezıdentimizdiń «Halyq únine qulaq asatyn memleket» tujyrymdamasynyń júzege asýy. Bul memlekettik qyzmetterdiń ashyqtyǵyna jańa qadam bolmaq. Sondyqtan biz úshin bul úlken oqıǵa dep oılaımyn. Barlyqtaryńyzdy quttyqtaımyn», - dedi Ómirzaq Shókeev.
Nysannyń ashylýy bul qoǵamdyq qatynastardyń transformatsııalanýynyń kelesi qadamy bola otyryp, memleket pen azamattardyń ózara árekettesýiniń jańa formatyn aıqyndaıdy.
Ortalyqtyń qyzmetine azamattardyń máselelerin jedel ári birlese sheshý, ótinishterdi qabyldaý, tegin quqyqtyq keńes kórsetý, memorgandardyń birinshi basshylarynyń qatysýymen qoǵamdyq qabyldaýlar, halyqtyń quqyqtyq saýatyn arttyrý boıynsha keshendi sharalar qabyldaý, sonymen qatar azamattardyń ótinishteri men shaǵymdaryn taldaý negizinde júıeli problemalardy anyqtaý jáne naqty sheshimder qabyldaý kiredi.
Jańa úlgidegi nysannyń jumysyna jergilikti bılik ókilderiniń laýazymdy tulǵalary, «Túrkistan - adaldyq alańy» jobalyq keńsesiniń menedjerleri, advokattar jáne qoǵam ókilderi tartylǵan.
«Parasat ortalyǵy» zamanaýı dızaın úlgisinde «open space» formatyndaǵy keńse retinde jumys jasaıtyn bolady.
Sonymen qatar, keńsede yńǵaıly kútý aımaǵy, tegin wi-fi jáne múmkindigi shekteýli azamattarǵa beıimdelgen jaı qarastyrylǵan.
Jańa jobanyń júzege asýy bılik pen halyqtyń arasyndaǵy araqashyqtyqty azaıtyp, azamattardyń bılik ınstıtýtyna degen senimin arttyrýyn qamtamasyz etedi.
