Túrkistan qalasynda oblystyq departamentter jańa ǵımaratqa kóshedi
TÚRKІSTAN. QazAqparat – Túrkistan oblysynyń ákimi Ómirzaq Shókeev Túrkistan qalasyndaǵy qurylysy aıaqtalýǵa jaqyn nysandardy aralap kórip, merdiger kompanııalardyń jaýapty ókilderine birqatar tapsyrma júktedi. Aımaq basshysy olarǵa nysandardyń qurylysyn ýaqtyly aıaqtap, bekitilgen kesteden aýytqymaý kerektigin eskertti, dep habarlaıdy QazAqparat tilshisi.
Óńir basshysy aldymen ákimshilik-iskerlik ortalyǵyndaǵy departamentter ǵımaratynda bolyp, ondaǵy jumysymen tanysty. Jańa ǵımaratta búginde jıhazdardy ornalastyrý jumysy tolyǵymen aıaqtalǵan. Nysannyń qurylys jumysyna 150 adam jumyldyrylyp, eki aýysymdy jumys uıymdastyrylǵan. Ǵımaratty jaqynda paıdalanýǵa tapsyrý josparlanyp, departamentterdiń qyzmetkerleri osynda ornalasatyn bolady.
Ómirzaq Shókeev munan soń «Kerýen saraı» kesheniniń qurylys aýmaǵyn aralap kórdi. Búginde keshenniń syrtqy qasbeti men ishki bóligi árlenip, bólmearalyq qysh qalanyp jatyr. Bul jumystarǵa 920 adam jumyldyrylǵan.
Aımaq basshysy zamanaýı úlgide salynyp jatqan Hempton qonaq úı kesheniniń jumys barysyn da baqylady. Qazirgi tańda qonaq úıdiń konstrýktsııasyn turǵyzý men shatyryn jabý, qasbeti men ǵımarattyń ishin árleý, bólmeleri bólinip jatyr. Oblys ákimi sonymen qatar Kongress hol, «Uly dala eli», drama teatr men «Rixos Turkestan» qonaq úıi jáne Q.A. ıAsaýı kesenesinde de júrgizilip jatqan aýqymdy jumystardyń barysyn qarap shyqty.
