Túrkistan qalasynda mamyr aıynda birqatar demalys oryndary ashylady
TÚRKІSTAN. QazAqparat – Túrkistan qalasynda mamyr aıynda birqatar demalys oryndary ashylady. Bul týraly oblys ákimi Ómirzaq Shókeevtiń tóraǵalyq etýimen ótken jıynda sóz boldy, dep habarlaıdy QazAqparat tilshisi.
Jıynda oblys ortalyǵynda kóptegen demalys oryndary paıda bolyp, kógaldandyrý men abattandyrý jumystary qarqyndy júrgizilip jatqany aıtyldy. Máselen, mamyr aıynyń 15-ne qaraı birneshe nysannyń qurylysy aıaqtalmaq. Buginde qalalyq fýtbol alańshasynda jasandy gazon tóselip, endi alańdy jaryq kózderine qosý jumystary júrgizilýde. Qabyldaý ortalyǵynyń janyndaǵy aýmaqty abattandyrý jáne kógaldandyrý jumystary da aıaqtalýǵa jaqyn. Ondaǵy jumystar mamyr aıynyń ortasynda aıaqtalady. Sonymen qatar, Túrkistan qalasynda boı kótergen Palma alleıasy ashylmaq. Qazirgi tańda balalar oıyn alańshasy ornatylyp, jaryqtandyrylýda. Sondaı-aq, birer kúnde Túrkistandaǵy temirjol aýmaǵyn abattandyrý jumystary tolyǵymen aıaqtalady dep josparlanyp otyr. Tórequlov kóshesindegi abattandyrý jumysy da sońyna deıin jetkizilip, paıdalanýǵa berilmek.
«Tuńǵysh Prezıdent saıabaǵy qurylysyndaǵy jalpy káriz jáne elektr júıeleri tolyqtaı aıaqtaldy. Saıabaq aýmaǵynda 3 myń túp aǵash otyrǵyzý josparlanyp, 50%-y otyrǵyzyldy. Jelilik saıabaq qurylysynda syrtqy sýǵarý júıeleriniń qurylysy, aǵashtardy otyrǵyzý, gazon tóseý jumystary, sonymen birge, kerýen joldary jáne kanal qurylysy jumystarynyń 60 paıyzy aıaqtalǵan. Túrkistan qalasyndaǵy turǵyn úı qurylysy da qarqyndy júrip jatyr. 24 turǵyn úı qurylys nysandary salynyp, aldaǵy qyrkúıek aıynda paıdalanýǵa berý josparlanǵan. Qurylys nysandaryna kúndelikti monıtorıng júrgiziledi»,- deıdi salaǵa jaýapty mamandar.
Apparat otyrysynda sondaı-aq, qala ákimi Rashıd Aıýpov Túrkistan qalasyn damytý baǵytyndaǵy atqarylǵan jumystar men josparlary týraly baıandama jasady.
Ákimniń aıtýynsha, ákimshilik-iskerlik ortalyǵy aýmaǵyndaǵy 7 qabatty 14 turǵyn úıdiń joǵarǵy qabattarynyń kirpishi qalanyp, qabataralyq plıta ornatý jumystary júrip jatyr. Batys Qytaı-Batys Eýropa tasjolynyń boıyndaǵy 7 qabatty 10 turǵyn úıdiń qurylysy qarqyndy júrip jatyr. Budan bólek, 12 qabatty 29 turǵyn úıdiń qurylysyndaǵy jumys ta qarqyndy. Jıyndy qortyndylaǵan aımaq basshysy Ómirzaq Shókeev barlyq qurylystaǵy saqtyq sharalarynyń qatań saqtanýyn qadaǵalaýdy, qurylys jumystaryn sapaly ári merziminde aıaqtaýdy mindettedi.
