Túrkistan qalasynda QMDB ókildigi ashyldy
Ókildiktiń ashylý saltanatyna Qazaqstan musylmandary dinı basqarmasynyń tóraǵasy, Bas múftı Serikbaı Oraz ben QR Qoǵamdyq damý vıtse-mınıstri Aryn Berik jáne oblys ákimi Janseıit Túımebaev pen oblys ardagerleri, zııaly qaýym ókilderi men meshit ımamdary qatystyQazaqstan musylmandary dinı basqarmasynyń Túrkistandaǵy ókili bolyp Astanadaǵy Áziret Sultan meshitiniń bas ımamy Naýryzbaı qajy Taǵanuly taǵaıyndaldy. Jıynda oblys ákimi atalǵan ókildiktiń ashylýy rýhanı qalanyń ómirine aıryqsha sıpat berip, ónegeli isterdiń uıytqysyna aınalar ıgi bastama bolǵaly turǵanyn jetkizdi.
«Qasıetti Islam dinin qadir tutyp, ómiriniń basty maqsatyna aınaldyrǵan óńirimizdiń árbir musylmany úshin qýanyshty osynaý jańalyqpen sizderdi quttyqtaımyn. Qazaqstan musylmandary dinı basqarmasynyń qasıetti de kıeli Túrkistanda turaqty jumys jasaıtyn ókildiginiń ashylýy Islam dininiń órkendep ósýine, dińgeginiń nyǵaıa túsýine oń yqpalyn tıgizetinine bizdiń senimimiz mol», - dedi Janseıit Túımebaev.
Atalǵan sharada sóz alǵan Qazaqstan musylmandary dinı basqarmasynyń tóraǵasy, Bas múftı, Serikbaı qajy Oraz tarıhı oqıǵa - Túrkistan oblysynyń dúnıege kelýimen barsha túrkistandyqtardy quttyqtap, ashylyp otyrǵan basqarmanyń ókildigi Islam dininiń órkendeýi jolynda jumys atqaratynyn aıtty.
«Qasterleıtin kıeli oryn Qoja Ahmet ıAssaýı babamyz jáne osy halqymyzdyń eń ardaqtylary, ulylary men jaqsylary meken tepken Túrkistanda búgin taǵy da erekshe sát. Elbasymyzdyń Túrkistandy oblys ortalyǵy retinde jáne rýhanı hám mádenı ortalyq retindegi damý ıgi bastamalaryn qoldaı otyryp, Qazaqstan musylmandary dinı basqarmasy tóralqa jáne ǵulamalar keńesiniń bir aýyz sheshimimen men ózimniń birinshi orynbasarym, Astanadaǵy Áziret Sultan meshitiniń bas ımamy bolyp qyzmet etip kelgen Naýryzbaı qajy Taǵanulyn ákelip sizderdiń aldaryńyzda tanystyraıyn dep otyrmyn. Óte tájirıbeli, bilimdi, osy bizdiń Orta Azııanyń, qazaq musylmandyq mektebiniń qalyptasqan jetik túleginiń biri. Sol úshin Túrkistan qalasynyń taǵy da rýhanı, mádenı jáne dinı ortalyq retinde damýy úshin osy bizdiń tarıhı sheshimimiz de taǵy da onyń salmaǵy men mańyzyn arttyra túsedi dep oılaımyn», - dedi Serikbaı qajy Oraz.
