Túrkistan qalasynda ındýstrıaldy aımaqtyń jumysy jandandy
TÚRKІSTAN. QazAqparat - Oblys ortalyǵy bolǵan Túrkistan qalasynda kásipkerlikti, aýyl sharýashylyǵyn jáne týrızmdi damytýǵa basa mán berilmek. Ásirese, ónerkásip jetekshi salaǵa aınalýy tıis. Sebebi, jańa óndiris oryndary ashylsa ǵana jumyssyzdyq azaımaq, dep habarlaıdy Túrkistan oblysy ákimdiginiń baspasóz qyzmeti.
Búginde Túrkistandaǵy ındýstrıaldy aımaqta túrli jobalar júzege asyrylyp jatyr. 2018 jyldyń qańtar-naýryz aılarynda ındýstrıaldy aımaqtaǵy kásiporyndardyń óndirgen ónim kólemi 343,3 mln. teńgeni quraǵan. Aǵymdaǵy jyldyń 3 aıynda ónerkásip óniminiń kólemi 4 331,2 mln teńge bolyp otyr. Máselen, ındýstrıaldy aımaqta ornalasqan jıhaz fabrıkasynda kún saıyn as bólmege jáne jatyn bólmege qajetti 100 garnıtýr shyǵarylady. Al, jylyna 30-35 myń garnıtýr shyǵarýǵa múmkindik bar. Aldaǵy ýaqytta mundaı kásiporyndar sany kóbeıedi.
Túrkistan qalasynyń ákimi Álipbek Óserbaevtyń aıtýynsha, shaharda óndiristi damytý baǵytynda jospar túzilip, aýqymdy jumystar atqarylmaq. Oblys ortalyǵyndaǵy ındýstrıaldy aımaq aýmaǵy 300 gektarǵa ulǵaıyp, onda zaman talabyna saıy zaýyttar men fabrıkalar salynady dep kútilýde. Qazirgi tańda shetelden ınvestor tartý jumystary júıelenip jatyr.
