Túrkistan qalasynda halyqaralyq teatr festıvali ótedi
TÚRKІSTAN. QazAqparat - Túrkistanda halyqaralyq tetar festıvali ótedi, dep habarlaıdy QazAqparat óńirlik kommýnıkatsııalar qyzmetine silteme jasap.
Búginde Túrkistan qalasy naǵyz mádenıet pen rýhanııattyń ortalyǵyna aınalyp keledi. Óıtkeni munda sońǵy eki jylda birneshe jańa mádenı nysandar boı kóterdi. Olardyń qatarynda Oblystyq qazaq drama teatry, «ıAsaýı» mýzeıi, «Uly dala eli» men «Qabyldaý» ortalyǵy, Kongress-holl, Amfıteatr syndy ǵımarattar bar.
Bul týraly Óńirlik kommýnıkatsııalar qyzmetinde ótken brıfıngte Túrkistan oblystyq mádenıet basqarmasynyń basshysy Ázimhan Qoılybaev baıandady.
Budan bólek, oblys ortalyǵynda qazaq handary men bıleri jáne «Túrki álemi» ortalyqtary, Túrkistan oblystyq ámbebap-ǵylymı kitaphanasynyń qurylysy júrgizilýde.
«Bıyl Ábý Nasyr ál-Farabıdiń 1150 jáne Abaıdyń 175 jyldyq mereıtoılaryna oraı Túrkistan qalasynda jańadan salynǵan oblystyq drama teatr mekemesiniń aldyna Ábý Nasyr ál-Farabıdiń, al «Oqýshylar saraıy» mekemesiniń aldyna Abaıdyń eskertkishteri ornatyldy. Sonymen qatar, sońǵy 9 aıda oblystaǵy 24 mýzeıde 2000-nan asa onlaın is-shara uıymdastyrylyp, 3369 jańa eksponat jınaqtaldy. Nátıjesinde oblystaǵy mýzeılerdiń jalpy qory 173 986 danaǵa jetip otyr», - dedi Ázimhan Serikuly.
Sondaı-aq, bıyl uly kompozıtor Shámshi Qaldaıaqovtyń 90 jyldyǵyna oraı Otyrar aýdanynda kompozıtordyń ózi turǵan úıinen Sh.Qaldaıaqov mýzeıi ashyldy. Basqarma basshysy kelesi jyly Túrkistan qalasynda halyqaralyq teatr festıvali ótetini josparlanyp otyrǵanyn jetkizdi.
Jalpy, búgingi tańda Túrkistan oblysynda 678 mádenıet jáne óner mekemesi jumys isteıdi. Onyń ishinde: 390 kitaphana, 251 klýb, 24 mýzeı, 2 kásibı teatr, 5 saıabaq, 2 ortalyq, 1 oblystyq fılarmonııa, 1 kórkemsýret galereıasy, 1 «Ońtústikfılm» mekemesi, 1 «Túrkistan saraıy» kontserttik mekemesi bar.
Jyl basynan beri koronavırýs indetiniń shekteý sharalarynyń talaptary saqtala otyryp, Túrkistan oblystyq mádenıet basqarmasynyń uıytqy bolýymen 10 oblystyq deńgeıdegi klýbtar men kitaphanalarda, mýzeılerde 9 myńnan astam is-shara ótkizilgen.
