Túrkistan qalasynda «Aýyl» partııasynyń respýblıkalyq shtaby ashyldy

TÚRKІSTAN. QazAqparat - Túrkistan qalasynda «Aýyl» partııasynyń «El amanaty» Jalpyulttyq saýalnama júrgizý boıynsha respýblıkalyq shtaby ashyldy. Atalǵan shtab halyq arasynda «esikten esikke deıin» qaǵıdatymen saýalnama toltyrý boıynsha túsindirý jumysyn júrgizip, dástúrli saýalnama júrgizý boıynsha elimizdiń barlyq óńirlerindegi volonter toptardyń jumysyn úılestiretin bolady, dep habarlaıdy QazAqparat tilshisi.

Respýblıkalyq shtabta sondaı-aq, respondentter toltyrǵan saýalnamalarǵa monıtorıng jasaýdy júzege asyrmaq. «El amanaty» eriktileri ınternetke qosylmaǵan shalǵaı aýyldardy da aralap, halyqtyń muń-muqtajyn saýalnamaǵa qosady.

Aıta keteıik, buǵan deıin «Aýyl» partııasy «El amanaty» Jalpyulttyq saýalnama júrgizýdi qolǵa alyp, 18 jastan asqan belsendi azamattardan qoǵamdaǵy áleýmettik-ekonomıkalyq problemalardy jınaqtaý jáne olardy sheshý joldaryn aıqyndaýdy maqsat etken bolatyn. Saýalnama 23 qyrkúıekten beri WhatsApp jáne Telegram qosymshalary men Facebook, Instagram áleýmettik jelileri arqyly tsıfrlyq túrde júrgizilip, oǵan úsh myńnan asa adam jaýap bergen. Onda aýyl turǵyndary tarapynan jer, aýyz sý men áleýmettik máselelerge qatysty saýaldar men usynystar kóptep túsken.

«Bul shtabqa respýblıkadan, óńir-óńirden aqparattar kelip túsedi. Aqparattardy qabyldap, qortyndylap, osy jerden saraptamasyn Astanaǵa ortalyq apparatqa jiberip otyramyz. Elektrondy saýalnamadan bólek, biz dástúrli saýalnama júrgizbekshimiz. Óıtkeni keıbir turǵyndardyń qolynda smartfondary joq, telefondary joq. Sondyqtan «El amanaty» aktsııasynyń saýalnamasyn dástúrli túrde júrgizýdi qolǵa alyp otyrmyz», - deıdi «El amanaty» Jalpyulttyq saýalnamasyn júrgizý boıynsha Respýblıkalyq shtabynyń jetekshisi Asylhan Batyrshaev.