Túrkistan qalasynda atmosferalyq aýanyń lastanýy 65 paıyzǵa azaıǵan

TÚRKІSTAN. QazAqparat - Túrkistan qalasynda atmosferalyq aýanyń lastanýy 65 paıyzǵa azaıǵan. Bul týraly oblystyq tabıǵı resýrstar jáne tabıǵat paıdalanýdy retteý basqarmasynyń basshysy Qaırat Abdýalıev málimdedi, dep habarlaıdy QazAqparat tilshisi.

Túrkistan oblysynyń aýmaǵynda aýa sapasyn avtomatty túrde baqylaıtyn 5 qondyrǵy bar. Olardyń úsheýi Túrkistan qalasynda, bireýi Kentaýda jáne Sastóbe aýylynda ornatylǵan. Onlaın rejımde ár 20 mınýt saıyn ólsheý júrgizilip, mobıldi qosymsha arqyly nátıjelerin kórip otyrýǵa bolady.

Al, aldaǵy ýaqytta avtomattandyrylǵan beket Saryaǵash pen Shardara aýdandarynda da ornatylmaq.

«Túrkistanda alleıalar kólemi artyp keledi. Aryq atyzdar qalpyna keltirilip, kógaldar kóptep egilip jatyr. Sonymen qatar, jeke sektordaǵy jáne kóp qabatty turǵyn úılerdiń 90 paıyzdan astamy tabıǵı gazǵa qosyldy. Aldaǵy ýaqytta da ekologııalyq ahýaldy jaqsartý boıynsha tıisti jumystar júrgiziledi», - dedi Qaırat Abdýalıev.