Túrkistan qalasynda 752 jumysshy jalaqysyn ala almaı otyr

TÚRKІSTAN. QazAqparat - Túrkistan qalasyndaǵy «Aqjol» JShS-niń jumysshylar aldyndaǵy úsh aılyq jalaqy qaryzy 232 mln 449 myń teńge bolǵan, dep habarlaıdy QazAqparat tilshisi.

Apta buryn Túrkistan qalasyndaǵy «Aqjol» JShS jumysshylary 4 aıdan beri jalaqylaryn ala almaı otyrǵandyǵyn aıtyp, narazylyqqa shyqqan bolatyn. Tipti, ýaqytyly jalaqy berilmese, jumysqa shyqpaımyz dep shaǵymdaryn jetkizgen edi.

Búgin ótken brıfıngte Túrkistan qalasynyń ákimi Nurbol Turashbekov máseleniń mán-jaıyna qatysty jaýap berdi.

«Kóterilip otyrǵan máselede «Aqjol» JShS bas merdiger emes, qosalqy merdiger retinde jumystar júrgizgen. Aldaǵy ýaqytta seriktestik ózderiniń atqarǵan jumystaryn bas merdigerge tolyqqandy dáleldep bergen jaǵdaıda aıtylǵan somanyń barlyǵy tólenedi» - dedi qala ákimi.

Al, qalanyń bas prokýrory Jannur Ahmetbek kez kelgen jumys berýshi jumysshylardyń eńbekaqysyn zańmen kózdelgen merzimde tolyq tóleýge mindetti ekendigin jetkizdi.

«Eńbekaqyny tóleýde bireýge silteme jasap, jaltarýǵa quqy joq» - dedi ol.

Jalpy seriktestik qaladaǵy qurylys salasynda, jol tóseý, temir beton óndirý, kirpish shyǵarý baǵytynda qyzmet atqarady. Oblystyń eńbek ınspektsııasy jónindegi basqarma basshysynyń mindetin atqarýshy ınspektor Askar Seıtkazınniń sózine súıensek, zańdy tulǵanyń jumysshylar aldyndaǵy jalaqy qaryzy naýryz aıyna 29 mln, sáýir aıyna 100 mln, mamyr 102 mln teńge bolǵan.

«Mindetti túrde oryndaý úshin arnaıy nusqama berildi. Odan bólek, zańdy tulǵaǵa ákimshilik is qozǵalyp, aıyppul salyndy. Bul jaǵdaı baqylaýda. Eger nusqamany ýaqytyly oryndamasa, sot oryndaýshylarǵa ótkizemiz», - dedi ınspektor.