Túrkistan qalasynda 40 otbasy baspanaly boldy
TÚRKІSTAN. QazAqparat - Táýelsizdiktiń 30 jyldyǵy merekesi qarsańynda Túrkistan qalasynda 40 otbasy baspanaly boldy. Turǵyndardy saltanatty jaǵdaıda quttyqtaǵan qala ákimi Nurbol Turashbekov páter kiltterin tabystady, dep habarlaıdy QazAqparat tilshisi.
Mereke qarsańyzda baspanaly bolǵan jandardyń biri Azamat Orazbaev bul páterdi jeti jyl kútkenin aıtady. Alty balany jalǵyz ózi tárbıelep otyrǵan áke úsh bólmeli páterdiń keń ári jyly ekenin aıtady.
«Shańyraq kótergenimizge 12 jyldan asty. Sonyń on bir jyl kóleminde páter jaldap turdyq. Armandaǵan páterimizge búgin qol jetkizip otyrmyz. Óte qýanyshtymyn. Qýanyshym qoınyma syımaı tur. Endi altıy balammen osy jerde jaqsy ómir súremiz degen úmittemin»,- deıdi kópbalaly áke.
Jalpy, Túrkistan qalasynda jeltoqsan aıynyń sońyna deıin baspana kezeginde turǵandarǵa jalpy 610 páter beriledi dep josparlanǵan. Olardyń barlyǵy – kópbalaly jáne áleýmettik jaǵynan álsiz toptaǵy otbasylarǵa tapsyrylmaq. Onyń ishinde, kóp balaly otbasyǵa 470 páter, álsiz toptaǵy otbasylarǵa 140 páter beriledi.
Búginde shahardyń ákimshilik-iskerlik ortalyǵy aýmaǵyndaǵy 14 kópqabatty turǵyn úıdiń 763 páteri «Otbasy bank» AQ arqyly jáne kópqabatty 3 turǵyn úıdiń 151 páteri «7-20-25» baǵdarlamasy arqyly nesıe júıesimen satylymǵa qoıyldy. Búginde munda bıýdjet esebinen 7, 9 jáne 12 qabatty 67 turǵyn úıdiń qurylysy júrýde. Sonymen birge jańa úılerdiń aýlalary abattandyrylyp, balalar alańqaılary salynyp jatyr.
