Túrkistan qalasynda 14 áleýmettik dúken jumys isteıdi

Aımaq basshysy Janseıit Túımebaevtyń tapsyrmasy boıynsha saýda jasap jatqan 14 dúken ótken jyldyń 1 jeltoqsanynan bastap qyzmet kórsetýde. Olardaǵy baǵalar sýpermarket jáne bazardaǵy naryq baǵasynan 15-17 paıyzǵa arzan. Atap aıtsaq, kartop - 70 teńge, pııaz - 48 teńge, sábiz - 65 teńge, makaron - 150 teńge, kúrish - 194 teńge, qaraqumyq - 145 teńge, bıdaı uny (1-suryp) - 87 teńge, kúnbaǵys maıy (1 lıtri) - 327 teńge, sıyr eti - 1250 teńge, qumsheker - 220 teńge, qyryqqabat 75 teńge turady.

Sonymen qosa, naýbaıhanalardan jetkiziletin nan baǵasyna saýda ústemesi qosylmaı, pavılondardaǵy satý baǵasy 65 teńge bolyp bekitilgen.

Pavılondar Túrkistan qalasy aýmaǵyn tolyq qamtý maqsatynda ornalastyrylǵan. Bul degenimiz - jergilikti halyqtyń azyq-túlik taýarlaryn kedergisiz alýyna qosymsha yńǵaılylyq týǵyzady.

«Barlyq satyp alynatyn taýarlar bekitilgen sapa standarttaryna sáıkes. Kókónis ónimderi Qazaqstannyń soltústik aımaqtarynan jetkiziledi, kúnbaǵys maıy Shyǵys Qazaqstan oblysynan, kúrish Qyzylorda, qant Jambyl oblystarynan, al qyryqqabat, makoron jáne et ónimderi jergilikti aýyl sharýashylyq ónimderin óndirýshilerden jetkiziledi», - dedi oblystyq turaqtandyrý qory dırektorynyń orynbasary Nursaıyn Ádil.

Sala mamandarynyń aıtýynsha, júrgizilip otyrǵan is-sharalar Túrkistan oblysynyń áleýmettik mańyzy bar azyq-túlik taýarlar baǵasyn retteýge jáne oń áser etýine qol jetkizedi. Halyq qamy úshin ashylyp otyrǵan áleýmettik dúkenderge dúıim jurt dán rıza. Bastysy azyq-túlik quny qol jetimdi baǵada saýdalanady. Satýshylardyń pikirinshe, búginde qala turǵyndary áleýmettik dúkenderden saýda jasaǵandy qalaıdy.

Aıta keteıik, turaqtandyrý qorynyń azyq-túlik taýarlaryna, aýdan ortalyqtary men aýyl okrýgteriniń qol jetimdiligin qamtamasyz etý úshin Túrkistan oblysy aýmaǵynda saýda pavılondaryn ornalastyrý josparlanyp otyr.