Túrkistan qalasynda 13 áleýmettik dúken jumys istep tur
TÚRKІSTAN. QazAqparat - Túrkistan qalasy aýmaǵynda ornalasqan 13 áleýmettik dúken men 5 saýda úıinde 18 túrli azyq-túlik taýarlary arzandatylǵan baǵada satylýda, dep habarlaıdy QazAqparat tilshisi.
Búgingi tańda Túrkistan oblysyna tıesili turaqtandyrý qorynda jalpy quny 954,9 mln teńgeniń 10 033,2 tonna taýary bar. Onyń ishinde turaqtandyrý qorynda - 3 727,9 tonna, «Aınalym shemasy» sheńberinde – 6305,3 tonna taýar saqtaýly tur. Al, Eski Iqan eldimekenindegi qoımada 102 tonna ónim bar, qalǵany jetkizýshilerdiń qoımasynda.
«Túrkistan qalasy aýmaǵynda 13 áleýmettik dúken men 5 saýda úıinde 18 túrli azyq-túlik taýarlary satylýda. Máselen, kartop pen sábiz - 100 teńge, pııaz - 70 teńge, tuz - 42 teńge, kúrish - 245 teńge, qant - 315 teńge, un - 150 teńge, kúnbaǵys maıy - 700 teńge, qaraqumyq - 450 teńgeden satylýda. Sondaı-aq, jumyrtqa - 34 teńge, taýyq eti - 870 teńge, qyryqqabat - 110 teńge, sút 2,5% - 265 teńge, aıran 2,5% - 270 teńge, sary maı – 2 500 teńge, irimshik – 1 500 teńge, bólke nan - 70 teńge kóleminde satylymda tur», - dedi turaqtandyrý qory departamentiniń dırektory Laýra Janasbaeva.
Sonymen qatar, ár jumada Túrkistan qalasyndaǵy Ekobazarda uıymdastyrylatyn azyq-túlik taýarlary jármeńkesinde taýarlar naryqtyq tómen baǵada turaqty satylýda. 2022 jyldyń basynan beri 10 ret azyq-túlik taýarlarynyń jármeńkesi ótkizildi. Jármeńkede 5 mln teńge somasyna 30,1 tn. taýar satylǵan.
